Тошкент вилоятининг Янгийўл тумани ИИБ навбатчилик қисмига 9 август, якшанба куни, тахминан, соат 20:00 да Янгийўл тумани, «Қўштепа» МФЙ, Ўзбекистон кўчасида яшовчи фуқародан 2018 йил 16 октябрда туғилган набираси Умиджон Рихситиллаев уйдан номаълум томонга чиқиб кетиб, бедарак йўқолганлиги ҳақида мурожаат қилган.
Боланинг йўқолиб қолгани ҳақида оила аъзолари томонидан Telegram каналларида эълонлар берилганди.
Бош прокуратуранинг «Дарё»га маълум қилишича, Янгийўл прокуратураси ва туман ИИБ тезкор ходимлари воқеа жойига чиқиб, воқеа жойини кўздан кечириб, ҳолат юзасидан тушунтириш хатлари олган. Олиб борилган терговга қадар текширув давомида икки яшар бола турган уйнинг орқа томонидан Жўнариқ канали оқиб ўтганлиги маълум бўлди.
Шунингдек, терговга қадар текширув давомида 16 ёшли О.Холдоров «Файзобод» МФЙ ҳудудидан оқиб ўтувчи Жўнариқ каналида ёши, тахминан, 1,5-2 ёш бўлган бола танаси сувда кўринганлиги, сувда сузишни билмаганлиги сабабли бола мурдасини сувдан олиб чиқа олмаганлигини ўз тушунтириш хатида баён қилган.
Шу билан бирга, туман прокуратураси, туман ИИБ ва туман фавқулодда вазиятлар бўлими билан ҳамкорликда Жўнариқ канали суви 3 соатга тўхтатиб қўйилиб, сувда бола мурдасини қидириш ишлари ташкиллаштирилди.
12 август куни Янгийўл тумани, «Мирзабобоев» МФЙ, Оҳунбобоев участкасидан оқиб ўтувчи Жўнариқ каналидан Умиджоннинг мурдаси жонсиз ҳолатда топилган.
Тошкент вилояти ҳокимлиги ушбу ҳолат юзасидан 13 август куни батафсил ахборот бериши маълум қилинди. Шунингдек, Жўнариқ канали бўйларида келгусида фуқаролар муҳофазаси бўйича амалга оширилиши режалаштирилаётган чора-тадбирлар тўғрисида ҳам маълумот эълон қилинади.
Изоҳ (0)