Ҳукуматнинг 2020 йил 11 августдаги 475-сонли қарорига асосан Асаджон Азатбекович Хўжаев бошқа ишга ўтиши муносабати билан Ўзбекистон Республикаси Ахборотлаштириш ва телекоммуникациялар соҳасида назорат бўйича давлат инспекциясининг бошлиғи лавозимидан озод этилди. Бу ҳақда ЎзА хабар берган.
Асаджон Хўжаев 2020 йил 29 июль куни Ўзбекистон Президенти администрацияси ҳузуридаги Ахборот ва оммавий коммуникациялар агентлигига директор этиб тайинланган. Шу куни АОКАда Президент администрацияси раҳбари Зайнилобиддин Низомиддинов бошчилигида кенгайтирилган йиғилиш бўлиб ўтган, унда Асаджон Хўжаевни Президент Администрацияси ҳузуридаги Ахборот ва оммавий коммуникациялар агентлигига директор этиб тайинлаш тўғрисидаги Президент қарори ўқиб эшиттирилган.
Хўжаев АОКА бош директори лавозимини эгаллагунига қадар, 2019 йил 14 ноябрда Ўзбекистон Ахборотлаштириш ва телекоммуникациялар соҳасида назорат бўйича давлат инспекциясининг бошлиғи этиб тайинланганди. Бунгача у 2018 йилнинг августидан бошлаб Ахборот хавфсизлиги ва жамоат тартибини таъминлашга кўмаклашиш маркази, кейинчалик 2018 йил ноябрь ойидан «Хавфсиз шаҳар» жамоат тартибига кўмаклашиш маркази директори лавозимларида ишлаган.
Изоҳ (0)