Белaрус президентлигига номзод Светлана Тихановская Беларусдан Литвага жўнаб кетгандан сўнг видеомурожаат билан чиқди, деб хабар бермоқда Meduza. Унинг мурожаати YouTube’даги «Страна для жизни» каналида «Мен болаларим олдига кетдим» номи остида чиққан.
«Биласизми, бутун бошли кампания мени обдон тоблаб, мен дош бера оладиган жуда катта куч берди деб ўйлагандим, лекин менимча, аввалгидай заиф аёллигимча қолдим. Ўзим учун жуда оғир қарор қабул қилдим. Бу қарорни мен мутлақо мустақил равишда қабул қилдим. Дўстларим ҳам, штаб ҳам, [турмуш ўртоғим] Сергей ҳам унга ҳеч қандай таъсир ўтказа олмасди. Биламан, кўпчилик мени тушунади, кўплар танқид қилади, кўплар ёмон кўриб қолади. Лекин биласизми, мен дуч келган бундай танловда қолишни худо кўрсатмасин. Шу сабабли илтимос, ўзингизни асранг. Ҳозир содир бўлаётган нарсалар ҳаётингизга арзимайди. Мен… Фарзандларим — ҳаётимизда мавжуд нарсаларнинг энг муҳимидир», — Светлана Тихановская.Унинг ишончли вакили Олга Ковалкова 10 август куни Тихановскаяни Беларусь ҳукумати томонидан мамлакатдан чиқариб юборилганини маълум қилганди. «Светлананинг бошқа иложи йўқ эди. Муҳими у озодликда ва тирик. Улар Мария Мороз билан жўнан кетишди. Бироқ Светлана жамоасининг бир қисми гаровга қолишда давом этмоқда», — деган Ковалкова.
Эслатиб ўтамиз, Беларусда 9 август, якшанба куни президент сайлови бўлиб ўтди. Пойтахт Минскда президент сайловидан кейин норозилик намойиши бошланган. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифот номзоди Светлана Тихановская эса расмий маълумотларга кўра, 9,9 фоиз овоз олган.
Кейинроқ Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Светлана Тихановскаянинг штаби 10 август куни кечаси у Беларусь Марказий сайлов комиссиясига борганидан сўнг йўқолиб қолганини билдирган. Кечга яқин Тихановская алоқага чиққан, бироқ қаерда эканлигини ошкор этмаган. Беларусь Давлат хавфсизлик қўмитаси Светлана Тихановскаяга уюштирилган суиқасднинг олди олинганини маълум қилган.
Изоҳ (0)