Дунёда янги миллиардер пайдо бўлгани маълум қилинди

Американинг Apple компанияси раҳбари Тим Кук дунё миллиардерлари қаторига қўшилди. Бу ҳақда Bloomberg хабар бермоқда.

«Кук компания ташкил этмаган раҳбарлар нуфузли клубларидан бирига қўшилди. Унинг соф даромади бир миллиард доллардан ошди», — дейилади хабарда.

Агентлик Кукнинг жами бойлиги миқдорини аниқ келтирмаган, аммо у Bloomberg Billionaires Index ҳисоб-китобларига кўра, Apple акциялари нархи кўтарилган бир пайтда 1 миллиард доллардан ошгани таъкидланган. Ўтган ҳафтада компания акциялари нархи қарийб 5 фоизга кўтарилган, натижада унинг бозор қиймати қарийб 2 триллион долларни ташкил этган.

Bloomberg маълумотларига кўра, Кук Apple’нинг қиймати 375 миллион доллар бўлган 848 мингта акциясига эгалик қилади. Компания қимматли қоғозлари йил бошидан буён 1,5 мартага қимматлашган ва 7 август, жума кунги савдолар якунига кўра улар қиймати бир дона учун 444,45 долларни ташкил этган.

Қайд этилишича, Кукнинг бойлиги очиқ манбалардан олинган маълумотларга асосланиб баҳоланган. Apple раҳбари катта миқдордаги пулларни аноним тарзда хайрия қилган бўлиши, шу сабабли унинг бойлиги 1 миллиард доллардан кам бўлиши ҳам мумкин.

Аввалроқ Жефф Безоснинг бойлиги 180 миллиард доллардан ошгани, Илон Маск дунёнинг энг бой одамлари рейтингида Уоррен Баффеттни ортда қолдиргани хабар берилган эди.