Жаҳон соғлиқни сақлаш ташкилоти раҳбари Тедрос Гебрейесус Женевада ўтказилган матбуот анжуманида бутун дунё бўйлаб коронавирус билан касалланганлар сони 20 миллионга, қурбонлар сони эса 750 мингга яқинлашаётган бўлса-да, COVID-19’га қарши курашда умид учқунлари борлигини маълум қилди.
«Кўпчилигингиз қайғуда эканлигингизни ва бу дунё учун қийин вақт эканлигини биламан. Бироқ мен ойдинлик киритишни истайман: умид учқунлари бор ва мамлакат, минтақа, шаҳар ёки посёлка, қаерда жойлашганидан қатъи назар COVID-19 тарқалишининг олдини олиш ҳеч қачон кеч эмас», — дейди Гебрейесус.
ЖССТ раҳбари коронавирус тарқалишига қатъий йўл қўймаслик ва бу борада муваффақиятли натижаларга эришган мамлакатдан ибрат олишга чақирган. «Меконг дарёси бўйидаги айрим давлатлар, Янги Зеландия, Руанда ва Кариб денгизи ҳамда Тинч океанидаги кўплаб орол давлатлар вирус тарқалишини эрта босқичда тўхтатишга муваффақ бўлди», — дея таъкидлайди ЖССТ раҳбари.
Унинг сўзларига кўра, Янги Зеландия коронавирусга қарши қандай курашиш лозимлиги борасида дунёга намуна бўлган. Ўтган дам олиш кунлари Янги Зеландия бош вазири Жасинда Ардерн мамлакат ичида коронавирус билан янги касалланиш ҳолатлари 100 кундан буён қайд этилмаганини маълум қилган.
ЖССТ раҳбари барча давлатлар етакчиларини ҳаракат қилишга, фуқароларни эса янги чеклов чораларига риоя қилишга чақирган.
Шунингдек, Гебрейесус коронавирусга қарши вакциналар ҳақида ҳам гапириб, ундан барча фойдалана олиши учун 100 миллиард доллардан ортиқ инвестиция зарур бўлишини маълум қилган.
Аввалроқ ЖССТ раҳбари коронавирусга қарши яратилаётган амалдаги вакциналар омадсизлик билан якун топиши мумкинлиги ҳақида фикр билдирганди.
Изоҳ (0)