Ўзбекистон Республикаси Вазирлар Маҳкамаси томонидан «2025 йилда Ўзбекистонда ёшлар ўртасидаги IV ёзги Осиё ўйинларини ўтказишга тайёргарлик кўриш чора-тадбирлари тўғрисида»ги ҳукумат қарори қабул қилинди. Бу ҳақда Жисмоний тарбия ва спорт вазирлиги хабар қилди.
Қарорда маълум қилинишича, Осиё Олимпия кенгашининг 2019 йил 28 сентябрь куни Қатарнинг Доха шаҳрида бўлиб ўтган 73-ижроқўми йиғилишида Тошкент шаҳри 2025 йилги ёшлар ўртасида IV ёзги Осиё ўйинлари мезбонига айланиши белгиланган.
Қарорга мувофиқ, Ўзбекистон Миллий олимпия қўмитаси ҳузурида «Тошкент—2025» ёзги Осиё ўйинларини ўтказиш дирекцияси ташкил этилади. Осиё ўйинларини юқори савияда ташкил этиш ва ўтказиш бўйича халқаро ва республика миқёсидаги тадбирлар ҳамда унинг доирасида кўргазмалар, конференциялар, илмий-амалий анжуманлар ва бошқа тадбирларни ўтказиш дирекциянинг асосий вазифаларидан бири этиб белгиланди.
Маълумот учун, ёшлар ўртасидаги Осиё ўйинлари мусобақаси 2009 йилдан буён ўтказиб келинади. 2009 йилдаги илк мусобақага Сингапур мезбонлик қилган. 2013 йилда эса Хитойнинг Нанкин шаҳри мусобақани ўзида қабул қилган. 2017 йилги мусобақани Шри-Ланканинг Хамбантота шаҳрида ўтказиш режалаштирилган, бироқ якунда Осиё ўйинлари ўтказилмай қолганди. 2021 йилги ўйинларга Хитойнинг Шантоу шаҳри мезбонлик қилади.
Аввалроқ Ўзбекистон 2030 йилги Осиё ўйинлари мезбонлигига ўз номзодини қўйиши маълум қилинган, бироқ май ойида Ўзбекистон мусобақа мезбонлиги учун ариза топширмагани маълум бўлганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)