«Ягона умумреспублика процессинг маркази» компанияси (ЯУПМ, Uzcard бренди)нинг таъсисчилари таркибида ўзгариш юз берди. Бу ҳақда, Корхона ва ташкилотларнинг ягона давлат регистри маълумотларига асосланиб, «Gazeta.uz» хабар бермоқда.
Аввалроқ, май ойида Ойбек Ботирович Турсунов Uzcard’нинг устав жамғармасидаги 75 фоиз улуш эгасига айлангани, қолган 25 фоиз улуш эса Uzcard ҳисобида қолгани ҳақида хабар берилган эди.
8 август ҳолатига кўра энди компаниянинг 51 фоизи Ўзбекистон Миллий банкига, 6 фоизи «Саноатқурилишбанк»га, 6 фоизи «Асака» банкига, 6 фоизи «Ипотека-банк»га ва яна 6 фоизи «Алоқабанк»га тегишли.
Қолган 25 фоиз улуш эса 6,25 фоиздан тўрт нафар жисмоний шахс — Мансур Пўлатович Усмонов, Камрон Анварович Акбаров, Темур Маҳмуджонович Озодов ва Обид Алимжонович Аъзамхўжаев ўртасида тақсимланган.
«Gazeta.uz»нинг ёзишича, Камрон Акбаров аввалроқ Uzcard бош директорининг молиявий масалалар бўйича ўринбосари сифатида ишлаган, Темур Озодов эса жамоат транспортида автоматлаштирилган тўлов тизимини татбиқ этиш билан шуғулланувчи АТТО компанияси раҳбари ҳисобланади.
Қайд этиш жоиз, бу Uzcard таъсисчилари таркибининг май ойидан бери биринчи ўзгариши эмас. Маълумотларга кўра, сўнгги ўзгаришга қадар маълум бир муддат компанияга беш нафар жисмоний шахс — Ойбек Ботирович Турсунов (74,80 фоиз), Мансур Пўлатович Усмонов, Камрон Анварович Акбаров, Темур Маҳмуджонович Озодов ва Обид Алимжонович Аъзамхўжаев (ҳар бири — 6,30 фоиздан) эгалик қилган.
Аҳрор Маҳмудов Uzcard раҳбари лавозимини сақлаб қолган. Таъсисчилар таркиби нима сабабдан ўзгаргани маълум эмас.
Изоҳ (0)