Бугун,

  • USD 11095.31
  • RUB 173.84
  • EUR 10772.44

Ижтимоий тармоқларда 2020 йил 26 июль куни машғулотни тасвирга олишга халақит бераётган фарзандларини уришган тарбиячи акс этган видеоролик тарқалди. Мактабгача таълим вазирлиги ушбу ҳолат бўйича муносабат билдирди.

Фото: Видеодан скрин

Фото: Видеодан скрин

Маълум қилинишича, роликдаги аёл Наманган вилояти, Чортоқ тумани 7-сонли мактабгача таълим ташкилоти тарбиячиси Ҳилола Нурматова эканлиги аниқланди.

«Ҳилола Нурматова 1982 йилда туғилган, маълумоти олий. Мактабгача таълим тизимида бир неча йилдан бери ишлаб келади. Ўтган давр мобайнида у томонидан ҳеч қандай ножўя ҳаракатлар амалга оширилмаган ва иш берувчи томонидан ижобий таърифланади. Карантин шароитида Ҳилола Нурматова масофадан ўқитиш усулини ўзлаштирган ҳолда, бир неча ой мобайнида, ҳафтасига 4-5 мартадан тарбияланувчилар учун видеомашғулотлар ўтиб келган.

Ёз мавсуми бошланиши МТТларда соғломлаштириш даври ҳисобланиб, тартибга кўра бу вақтда фаол таълим жараёни тўхтатилади. Аммо бир неча ташаббускор тарбиячилар, улар қаторида Ҳилола Нурматова ҳам, тарбияланувчиларнинг бўш вақти мазмунли ва фойдали ўтиши учун видеомашғулотларни давом эттиришга қарор қилади.

2020 йилнинг 15 июль куни уй шароитида видеомашғулотни ёзиб олиш жарауонида Ҳилола Нурматова ўз фарзандларини тарбиячи касбий этикасига зид равишда қўпол тарзда койиб ташлайди. Бу ҳолат акс этган ролик, кейин тайёрланган видеомашғулот ўрнига, янглиш равишда МТТ Telegram гуруҳига жойланади ва тезда ўчириб ташланади. Шунга қарамай янглиш жойланиб, ўчирилган ролик орадан 11 кун ўтиб ижтимоий тармоқларда тарқалиб кетади.

Ҳолатни ўрганиш жараёнида ўша куни Ҳилола Нурматова видеомашғулотни бир неча марта ёзиб олишга урингани маълум бўлди. Аммо иш билан уй вазифаларини бир вақтда бажариш мажбурияти, жумладан, болалар хархашаси ҳиссий мувозанатдан чиқиб кетиши, натижада назоратни йўқотган ҳолда овозини баландлатишига сабаб бўлган.

Бу воқеа Чортоқ тумани мактабгача таълим бўлими ҳамда Наманган вилояти Мактабгача таълим бошқармаси томонидан атрофлича ўрганиб чиқилди ва маълум хулосаларга келинди», – дейилади МТВ хабарида.

Қайд этилишича, тарбиячи Ҳилола Нурматова касбий этика қоидаларини бузгани учун унга нисбатан интизомий жазо чораси қўлланилган. Карантин якунланиб, МТТлар фаолияти тиклангач 7-сонли МТТ ҳамда Чортоқ тумани мактабгача таълим бўлими томонидан бу тарбиячининг педагогик фаолияти мониторинг қилиб борилиши белгиланган. 7-сонли МТТ раҳбарига эса огоҳлантириш берилган.

Туман МТБсига ўзига тегишли ҳудудда масофадан мактабгача таълим хизматини кўрсатиш жараёни устидан кузатишни кучайтириш, унинг сифатини яхшилаш, мактабгача таълим тизими ходимлари учун қулай шароитлар яратиш бўйича тавсиялар берилгани таъкидланган.

«Ҳурматли ҳамюртлар! Мактабгача таълим вазирлиги болаларга нисбатан ҳар қандай қўпол муносабатга қарши эканлигини маълум қилади. Шунингдек, аҳоли орасида коронавирус пандемияси натижасида асабийлашиш ҳолатлари кўп кузатилаётгани сабабли барчангизни бир-бирингизга нисбатан сабрли бўлишга чақирамиз. Шу билан бирга сизлардан ўзи учун янги ва ноодатий бўлган масофадан таълим жараёнини олиб бораётган педагогларимиз шароити ва ҳолатини тушунишга ҳаракат қилишингизни сўраймиз», – дейилади вазирлик хабарида.

Аввалроқ вазирлик боғчалар фаолиятини қайта тиклаш учун тайёргарлик кўрилаётганини маълум қилган эди.

Изоҳ
Асосий янгиликлар
Дунё
Вафотидан кейин тақдирланган Тупак Шакур, Исроил армиясига тош отаётган фаластинлик, пичоқланган болалар — 8 июнь суратлари
Қозоғистон
Қозоғистонда одамлар орасида Сибир яраси аниқланди
Дунё
БМТ Фаластинда содир этилган уруш жиноятлари учун Исроилни айбдор деб топди