Зидан Гвардиолага қарши. Рамоссиз «Реал» ва Агуэросиз «Сити» ўйини ҳақида

Мадриднинг «Реал» клуби 7 август, жума оқшомида Чемпионлар Лигаси 1/8 финал босқичи доирасида «Манчестер Сити» майдонига сафар қилади.

«Манчестер Сити» Англия Премьер Лигасида (ёмон натижа бўлмаган) иккинчи ўринни эгаллади, Лига Кубогини қўлга киритди, бироқ Чемпионлар Лигаси «шаҳарликлар» учун ҳамон армон бўлиб қолмоқда. Мадридликлар эса 3 йиллик танаффусдан сўнг яна Ла Лигада ғалаба қозонди ва қайсидир маънода 2019/20 йилги мавсум учун қўйилган минимум вазифани бажарди. Ахир кимсан Мессиси бор «Барселона» ортда қолдирилди. Аммо Зиданнинг «Реал»и  Чемпионлар Лигасига ҳеч қачон оддий ўйинга бўлгани каби қарамаган. Шундан экан, майдонда аёвсиз кураш боришига ҳеч қандай шубҳа йўқ.

Жамоаларнинг илк учрашуви

26 февраль санасида «Реал» «Сантьяго Бернабеу»да «Манчестер Сити»ни қабул қилади. Учрашувнинг дастлабки бўлими хавфли вазиятларга бой, бироқ голсиз ўтади. Асосий воқеалар эса танаффусдан сўнг, яъни иккинчи 45 дақиқаликда содир бўлади. Дастлаб 60-дақиқада Иско ҳисобни очган бўлса, орадан 20 дақиқа ўтар-ўтмас «Сити» орадаги фарқни йўққа чиқаради. 83-дақиқага келиб эса де Брюйне 11 пенальтини зарбасини аниқ амалга ошириб, ўйинга якуний нуқтани қўяди.

Учрашувдаги голлардан-да эсда қоларли вазият 86-дақиқада «қироллик клуби» сардори Серхио Рамоснинг майдондан четлатилгани бўлди. Шундай экан Рамос Манчестердаги баҳсда жамоасига ёрдам бера олмайди.

Ўйинга оид муҳим жиҳатлар

«Реал» кейинги босқичга ўтиш учун «Etihad»да камида иккита гол уриши керак. «Манчестер Сити» Мадридда нафақат ғалаба қозонди, балки икки бор рақиб дарвозасини ишғол этиб, ўз учун яхшигина устунлик яратиб олишга муваффақ бўлди. Шу жиҳатларни ҳисобга олиб, Гвардиоланинг ўйинни «қуритишини» тахмин қилиш тўғри бўлмайди, боиси: биринчидан, бу умуман Пепнинг услубига тўғри келмайди, иккинчидан, жамоанинг ҳимоя чизиғи ва дарвозабони ҳам кўкрак кериб мақтанишга имкон бермайди.

«Реал» Зидан бошқарувида Чемпионлар Лигаси плей-офф ўйинларида фақатгина бир марта мағлубиятга учраганди (2016 йилги мавсумда «Вольфсбург»га қарши чорак финал ўйинида). Чемпионлар Лигаси плей-оффининг бошқа барча ўйинларида Зидан жамоаси ҳеч қачон биринчи учрашувда ютқазмаган эди.

Йўқотишлар: Рамоссиз «Реал» ва Агуэросиз «Сити»

«Реал»нинг асосий йўқотиши, шубҳасиз, Серхио Рамос. Серхио биринчи ўйинда жамоасини эҳтимолий учинчи голдан қутқариб қолгани учун ўйиндан четлатилганди. Рамос ўйинда қатнаша олмаса ҳам, сардор сифатида жамоа билан Манчестерга ташриф буюрди. Шунингдек, Мариано Диас коронавирусдан тузалган бўлса-да, ўйин қайдномасидан ўрин олмаган. Бундан ташқари, Марселонинг майдонга тушиши ҳам сўроқ остида турибди. Аммо бразилиялик футболчи Гарет Бэйл ва Хамес Родригесдан фарқли ўлароқ, ўйин қайдномасига киритилган. Уэльслик ва колумбиялик Зидан билан ҳамон тил топиша олгани йўқ. Катта эҳтимол билан ҳар иккаласи ҳам ёзда жамоани тарк этади.

«Манчестер Сити» ҳам 1/8 финал жавоб ўйини олдидан йўқотишларга эга: Бенжамен Менди дисквалификацияси туфайли жамоага ёрдам беролмаса, тиззасидаги жароҳат Серхио Агуэронинг ўйнашига халақит беради. Пеп сўнгги икки ўйинда Мендининг ўрнига Жоау Канселуни чап қанот синаб кўрди. Агуэро эса 22 июндан бери майдон ташқарисида «сайр қилмоқда».

Иккала жамоа ўртасидаги жами тўқнашувлар статистикаси

• 7 та учрашув
• «Реал»да — 3 та ғалаба
• «Манчестер Сити»да — 2 та ғалаба
• 2 та дуранг
• «Реал» — 11 та гол урган
• «Манчестер Сити» — 10 та гол урган
• «Реал»нинг энг йирик ғалабаси — 4:1
• «Манчестер Сити»нинг энг йирик ғалабаси: 4:1
• Энг сермаҳсул ўйинлар: 4:1, 2:3 («Сити»); 4:1, 3:2 («Реал»)
• Энг сермаҳсул дуранг: 1:1

Биринчи учрашувдан кейин кўп вақт ўтди. Ўша пайтда жавоб учрашуви ўз майдонимизда бўлишини билардик. Албатта, биз ушбу мусобақада ғалаба қозонишни истаймиз. Бунинг учун айнан «Реал» каби жамоаларни мағлуб этишимиз лозим. Мен яхши ўйин кўрсатамиз ва ғалаба қозонамиз деб ўйлаяпман. Бу менинг ҳиссиётларим. Биз тайёрмиз.Хосеп Гвардиола «Манчестер Сити» устози

Ҳаммаси қандай якун топишини билмайман, лекин бу икки кучли жамоа ўртасидаги учрашув бўлади ва бу асосийси. Агар охиригача боришни истасак, тўртта финалда ўйнашимиз керак. Уларнинг биринчиси «Сити»га қарши бўлади. Энг муҳими, ҳамманинг жисмоний ҳолати яхши, чунки тайёргарлик кўриш учун етарлича вақт бўлди. Азар ҳам яхши ҳолатда.

Зинедин Зидан «Реал» бош мураббийи