Россиядаги Нефть ва газ илмий-тадқиқот ва лойиҳалаштириш институти раиси ўринбосари Денис Мишченко бошчилигида Renaissance Heavy Industries ва Yamata Yatirim İnşaat Turizm ve Ticaret компаниялари вакилларидан иборат делегация Ўзбекистонга ташриф буюрди.
Бандлик ва меҳнат муносабатлари вазирлиги матбуот хизматидан хабар беришларича, меҳмонлар Ўзбекистон ҳукуматининг Хорижда вақтинчалик меҳнат фаолиятини амалга ошираётган фуқаролар ҳуқуқларини ҳимоя қилиш масалалари ва халқаро иқтисодий ҳамкорлик департаменти ва Меҳнат вазирлигида учрашувлар ўтказган.
Учрашувларда пандемия шароитида меҳнат мигрантлари ҳуқуқларини ҳимоя қилиш, карантин чекловлари сабаб четга чиқа олмай қолган Ўзбекистон фуқароларини Россияга ташкиллаштирилган ҳолда ишга жалб қилиш, уларга касб ва тил ўргатиш каби масалалар муҳокама этилган.
«Икки томонлама музокараларда йил якунига қадар 4200 нафар фуқарони йирик қурилиш объектларига ишга жалб қилиш, улар учун қулай шароитлар яратиш, транспорт, ишлаш учун ҳужжатларни расмийлаштириш, иш ҳақи ва бошқа масалалар бўйича кейинги вазифалар белгилаб олинди», — дейилади хабарда.
Вазирликнинг қайд этишича, ваколатли органларнинг саъй-ҳаракатлари билан 31 июль куни 144 нафар Ўзбекистон фуқароси Россиянинг Амур вилоятидаги газни қайта ишлаш заводи қурилишида ишлаш учун ташкиллаштирилган ҳолда чартер рейс билан учиб кетди.
Эслатиб ўтамиз, июль ойида Россияда Renaissance компаниялар гуруҳининг йирик қурилиш майдонларида ишлаётган ўзбекистонликлар иш ташлашлар уюштиргани ҳақида хабарлар берилган эди.
Изоҳ (0)