Тошкентда коронавирусга чалинган 39 ёшли эркак вафот этди, дея 7 август куни хабар берди Соғлиқни сақлаш вазирлиги. Марҳумда касаллик айнан қачон аниқлангани, у қайси шифохонага ётқизилгани ва айнан қайси санада вафот этганига аниқлик киритилмаган.
«Олмазор туманида яшаган 39 ёшли Б.С. (эркак) ҳамда Учтепа туманида яшаган 68 ёшли Л.К. (аёл), жами икки нафар коронавирусга чалинган бемор вафот этди», — дейилади ССВнинг 7 август куни соат 10:00 да берилган ахборотида. Қўшимча тафсилотлар берилмаган.
Шундай қилиб, ССВ ҳозиргача Ўзбекистонда 179 кишининг коронавирус инфекцияси асоратлари оқибатида вафот этгани эълон қилди. Бундан ташқари, Ўзбекистонда расман яна саккиз кишининг коронавирусдан вафот этгани маълум қилинган, бироқ ушбу ҳолатлар юзасидан ССВ ҳали ҳам ахборот бермади.
Маълумот учун, Ўзбекистонда ҳозиргача 28 809 кишида коронавирус аниқланган, шундан 19 587 нафари соғайган. 7 август соат 10:00 ҳолатига кўра расман 9 043 киши коронавирусдан даволанмоқда, шундан 728 нафари оғир, 217 нафари эса ўта оғир аҳволда.
Изоҳ (0)