Rossiyadagi Neft va gaz ilmiy-tadqiqot va loyihalashtirish instituti raisi o‘rinbosari Denis Mishchenko boshchiligida Renaissance Heavy Industries va Yamata Yatirim İnşaat Turizm ve Ticaret kompaniyalari vakillaridan iborat delegatsiya O‘zbekistonga tashrif buyurdi.
Bandlik va mehnat munosabatlari vazirligi matbuot xizmatidan xabar berishlaricha, mehmonlar O‘zbekiston hukumatining Xorijda vaqtinchalik mehnat faoliyatini amalga oshirayotgan fuqarolar huquqlarini himoya qilish masalalari va xalqaro iqtisodiy hamkorlik departamenti va Mehnat vazirligida uchrashuvlar o‘tkazgan.
Uchrashuvlarda pandemiya sharoitida mehnat migrantlari huquqlarini himoya qilish, karantin cheklovlari sabab chetga chiqa olmay qolgan O‘zbekiston fuqarolarini Rossiyaga tashkillashtirilgan holda ishga jalb qilish, ularga kasb va til o‘rgatish kabi masalalar muhokama etilgan.
“Ikki tomonlama muzokaralarda yil yakuniga qadar 4200 nafar fuqaroni yirik qurilish obyektlariga ishga jalb qilish, ular uchun qulay sharoitlar yaratish, transport, ishlash uchun hujjatlarni rasmiylashtirish, ish haqi va boshqa masalalar bo‘yicha keyingi vazifalar belgilab olindi”, — deyiladi xabarda.
Vazirlikning qayd etishicha, vakolatli organlarning sa’y-harakatlari bilan 31-iyul kuni 144 nafar O‘zbekiston fuqarosi Rossiyaning Amur viloyatidagi gazni qayta ishlash zavodi qurilishida ishlash uchun tashkillashtirilgan holda charter reys bilan uchib ketdi.
Eslatib o‘tamiz, iyul oyida Rossiyada Renaissance kompaniyalar guruhining yirik qurilish maydonlarida ishlayotgan o‘zbekistonliklar ish tashlashlar uyushtirgani haqida xabarlar berilgan edi.
Izoh (0)