Андижон вилояти ҳокими Шуҳрат Абдураҳмонов аҳолига қилган навбатдаги мурожаатида бугунги шароитдан келиб чиқиб, карантин қоидалари асосида яшашни ўрганиш кераклиги ҳамда иқтисодиётни ҳам ривожлантириш зарурлигини айтиб ўтган. Бу ҳақда «Дарё» мухбири Умиджон Мамарасулов хабар берди.
Вилоят ҳокими ўз мурожаатида ҳолатни барқарорлаштириш мақсадида 2020 йилнинг 10 июлидан бошлаб карантин қоидалари қайта тикланганини, уй шароитида даволанаётган беморлар ҳамда карантинга олинган шахсларга тиббий маслаҳат бериш мақсадида 1105 қисқа рақамли Call-марказ фаолияти йўлга қўйилганини таъкидлаган.
Ҳокимнинг қайд этишича, вилоятда мавсум бошидан буён 102461 нафар фуқаро карантинга олинган. Уларнинг 7645 нафари четдан келган фуқаролар ҳисобланади. Шу кунга қадар 93946 нафари карантиндан чиқарилган.
Таъкидланишича, ҳозирда 8515 нафар фуқаро карантин ва тиббий кузатувда сақланмоқда. Карантин даврида вирусга чалинишда гумон қилинган фуқаролардан 112 мингдан ортиқ намуналар олиниб, текширувдан ўтказилган. 2020 йил 5 август ҳолатига кўра вилоятда вирусга чалинган фуқаролар сони 1058 нафарни ташкил этмоқда. Уларнинг 377 нафари четдан келган, карантин муассасасидаги фуқаролар ҳисобланади. Бугунги кунга қадар 978 нафар, яъни, 92 фоиз беморлар вирусдан буткул соғайган.
Ҳозирда вилоятда коронавирусга чалинган 78 нафар бемор даволанмоқда. Беморларнинг икки нафари «Дўстлик» чегара пости орқали Қирғизистондан ўтган, карантин муассасасида бўлган фуқаролар бўлса, 76 нафари уй карантинидаги фуқаролардир. Даволанаётган беморларнинг тўрт нафари оғир, 74 нафарининг аҳволи эса қониқарли ва яхши ҳолатда.
«Бу йил оғир синовларга бой бўлди. Тўрт ярим ойдан буён мамлакатимизда карантин ҳукм сурмоқда. Шу муддат давомида биз кучайтирилган карантин чекловларини ҳам, карантин чекловлари юмшатилган ҳолатларни ҳам бошимиздан ўтказдик. Бу касаллик қачонгача давом этади, билмаймиз. Шу сабабли бугунги шароитдан келиб чиқиб, карантин қоидалари асосида яшашни ўрганишимиз кераклиги ҳамда иқтисодиётни ҳам ривожлантириш зарурлигини таъкидламоқчиман. Барча фуқароларимизни карантин талабларига қатъий риоя қилишга чақираман. Ҳар ким ўз соғлигига бефарқ бўлмаслиги лозим», — деган Шуҳрат Абдураҳмонов.
Изоҳ (0)