Сергели, Чилонзор ва Учтепа туманларининг бир қисми, шунингдек, Мирзо Улуғбек туманидаги Улуғбек посёлкаси Тошкент вилояти ҳудудига қўшилади. Бу ҳақда Ўзбекистон қурилиш вазири Ботир Зокиров «Ўзбекистон 24» телеканалига берган интервьюсида маълум қилди.
Унинг сўзларига кўра, Сергели туманининг Тошкент ҳалқа автомобиль йўли бўйидаги 37 гектари, саноат зоналар жойлашган ҳудудлар пойтахтдан ташқарида жойлашган. Ушбу ҳудудларни Тошкент вилоятига қўшиш режалаштирилмоқда.
Чилонзор ва Сергели туманларининг умумий 135 гектари Тошкент вилоятига ўтади.
Бундан ташқари, Учтепа туманининг Тошкент ҳалқа автомобиль йўлининг чап қисмида жойлашган 453 гектари Тошкент вилоятининг Зангиота туманига берилади.
«Буларнинг барчаси пойтахт ва вилоят ўртасидаги чегарани аниқ белгилаб олиш учун амалга оширилмоқда», — дейди Ботир Зокиров.
Шунингдек, эфирда Президент Тошкентнинг Мирзо Улуғбек тумани таркибига кирувчи Улуғбек посёлкасининг 385 гектарини Тошкент вилоятига ўтказиш борасидаги таклифни маъқуллагани маълум қилинди. Посёлка Қибрай туманининг маъмурий марказига айланиши кутилмоқда.
«Давергеодезкадастр» раиси Ҳалилулло Тўрахўжаевнинг маълум қилишича, Президент қўшни туманлар ва Тошкент вилоятининг ҳудудларини ўзгартириш масаласини кўтарган. Маълум қилинишича, бу ерда жами 19 та анклав ҳудудлар мавжуд.
Масалан, 62 гектарни Қибрай туманидан Бўстонлиқ туманига ҳамда яна 55 гектарни Юқори Чирчиқ туманига ўтказиш маъқулланган. Бўстонлиқ туманининг 257 гектари Чирчиқ шаҳрига ўтказилади.
Бундан ташқари, Ангрен шаҳрининг 1094 гектари Паркент туманига ва яна 140 гектари Оҳангарон туманига берилади. Шу билан бирга, Паркент тумани Бўстонлиқ туманидан 493 гектар ҳудудни олади.
Пискент туманидан 287 гектар Бўка туманига, Бўка туманидан эса 8 гектар ҳудуд Оққўрғон туманига берилади.
Режага кўра, Янгийўл туманининг 196 гектари Янгийўл шаҳри ҳудудига айланади. Янгийўл ва Зангиота туманлари орасидаги чегарадаги 296 гектар ҳудуд темир йўл чегараларини белгилаш орқали оптималлаштирилади.
5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишгани тўғрисида хабар берилганди. Таъкидланишича, аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган.
Ишчи гуруҳ томонидан Сергели туманидан 1752 гектар, Бектемирдан 267 гектар, Зангиотадан қарийб 328, Қуйи Чирчиқдан салкам 129, Янгийўлдан 263, Ўрта Чирчиқдан 1346 гектар ажратиб, Янги ҳаёт туманини жами 4085 гектарда ташкил этиш бўйича таклиф ишлаб чиқилган.
Изоҳ (0)