Австралиялик ҳарбийлар Микронезияда жойлашган кимсасиз оролдаги қумга туширилган SOS ёзуви орқали у ердан бедарак йўқолган уч нафар денгизчини топди. Бу ҳақда Австралия Мудофаа вазирлиги хабар берди.
Уч нафар эркак 30 июль куни иккита маржон ороли орасидаги 43 километр йўлни босиб ўтишга уриниб, бедарак йўқолган эди. Улар ўз манзилларида кетишда йўналишдан адашиб ва кемада ёқилғи ҳам тугаб қолган.
Орадан уч кун ўтгач, 2 август куни фуқароларни қидиришга киришган Австралия ва Америка самолётлари кимсасиз оролдаги SOS ёзувини пайқаб қолган. Шундан сўнг, оролга «Канберра» десантчилар кемаси йўл олган бўлиб, қирғоқдан уч нафар денгизчи топилган. Маълум бўлишича, денгизчилар ўзлари йўл олган ҳудуддан 190 километр узоққа кетиб қолган.
Адашган саёҳатчилар тирик ва соғлом. Ҳарбий вертолёт уларга озиқ-овқат маҳсулотларини етказиб берган, яқин орада эса оролга Микронезия патруль кемаси келиб, денгизчиларни олиб кетади.
Эслатиб ўтамиз, 2016 йилда кемаси Гонолулудан 2600 мил узоқликда бўлган кимсасиз Фанадик оролида ҳалокатга учраган уч нафар денгизчи пўртанадан уч кун ўтиб топилган эди.
Изоҳ (0)