Sulton Tex Group раҳбари Нурбек Эргашев қишлоқ хўжалиги вазири Жамшид Хўжаевга очиқчасига гаплашиб олишни таклиф қилди

Sulton Tex Group раҳбари Нурбек Эргашев кластер фаолиятига муносабат билдириб, пахтачилик кластеридан ғалла ҳосилдорилиги учун сўралган 5,6 миллиард сўм пул асосли эканлигини, бу қонунга зид эмаслигини исботлашга уринган қишлоқ хўжалиги вазири Жамшид Хўжаевга ўртадаги англашилмовчилик юзасидан матбуот анжумани ташкил қилиб, журналистлар олдида очиқчасига гаплашиб олишни таклиф қилди. Бу ҳақда «Дарё» мухбири билан суҳбатлашган Sulton Tex Group корхонаси раҳбари Нурбек Эргашев маълум қилди.

«Туман ҳокимлиги ва корхонамиз раҳбарлигидаги кластер можаросига ‘катта’лардан қишлоқ хўжалиги вазири биринчилардан бўлиб муносабат билдирди. Бу яхши албатта, аммо вазирнинг пахтачилик кластеридан ғалла учун пул сўралганини қонуний дейиши, тўғриси, бизни ҳайратлантирди, — дейди Нурбек Эргашев. — Вазирга вазият очиқланиши учун матбуот анжумани ташкил қилиб, кластер фаолияти ҳақида хулоса бериб, тўртта камчилигимиз ҳақида айтган 16 кишидан иборат вакил чақиртиришни, журналистлар олдида очиқчасига гаплашиб олишни таклиф қиляпмиз. Аммо вазирлик ҳозирча жавоб бермади».

Қишлоқ хўжалиги вазири кластер раҳбариятини фермерлар манфаатини оёқости қилишда айблаганди. Нурбек Эргашев эса буни рад этиб, «Республикадан инсофли, нейтрал ишчи гуруҳ тузиб беринг, дронлар ёрдамида сувли ерларни таҳлил қилиб кўрайлик. Ўшанда Қарши туманидаги ерлардан қанчалик самарали фойдаланилаётганини яққол кўриш мумкин. Шунда ер кимларнинг манфаати ва чўнтагига хизмат қилаётгани ойдинлашади», — деди.

«Айнан қайси ҳолатда фермер манфаати бузиляпти экан? Трактор олиб келиш буюрилди — олиб келдик. Фермерлар ҳақида арзон ишчи кучи, мавжуд ресурс, дебсиз. Биз етиштирилган пахтани текинга ёки арзон баҳода оляпмизми? Кечирасиз, эндигина фермернинг елкасига шамол тегиб, косаси оқара бошлаганди. Қўшиб ёзадиган ‘химия’дан, ёқилғидан уриб қоладиган ФЁТШдан, бажарилмаган агротехник тадбирларни бажарилди, деб ёзиб қўядиган ММТПдан қутилаётганди. Қолаверса, таъминотни вақтида сифатли етказиш ташкил қилиниб, ҳар бир фермер билан индивидуал ишлаш йўлга қўйилаётганди. Энг асосийси, топширган ҳосили учун пулини вақтида, ҳеч қандай тўсиқларсиз, тамагирликсиз йил якуни 31 декабргача қўлига олишни бошлаганди», — дейди кластер раҳбари.

«Фермер кредитни ўзининг ҳисоб рақамига тушириб, ўзи ишлатсин дебсиз. Жуда тўғри фикрингиз. Шунда фермернинг масъулияти ортади, ҳар бир тийинни ўйлаб сарфлайди. Лекин кластер ҳисоб рақамидаги пулни ғалла ҳосилдорлиги деб ўзбошимчалик билан сарфлашга уринилганидек, фермер ҳисоб рақамидаги пул олиб қўйилмаслигига кафолат борми?, — дейди Нурбек Эргашев. — Ўзининг моддий-техника базаси бўлган фермернинг юқори ҳосил олиб, фойда кўриши биз учун айни муддао, буни олқишлаймиз. Лекин ҳамма фермерда ҳам бу имконият йўқ. Қўли калталик қилади, уларнинг бу ҳолатга тушиб қолишига ҳам шу — сиз ишлаб турган тизим айбдор».

Нурбек Эргашевнинг маълумот беришича, Бешкент пахта тозалаш заводини ҳам тортиб олишга ҳаракат бошланган.

«Бешкент пахта заводи беш йил муддатда тўлаб бериш шарти билан сотилдими, шартнома шартлари бузилгани йўқми, вақтида тўловларни амалга ошириб боряпмизми? Нега унда йиғилиш баёнида пахта заводини қайтариш кўрсатиб ўтилган? Биз бу ҳудудда янги завод қурдик, сифат-сертификат лабораториясини барпо этяпмиз, ишлаб чиқариш харажатларини камайтириш мақсадида кетма-кет лойиҳаларни режалаштириб, барча жараёнларни қамраган кичик шаҳарча қуриляпти. Замонавий пахта заводи, уруғчилик цехи, ёғ заводи, йигирув, тўқув, тикув ва ҳоказо. Бу бутун бошли ишлаб чиқариш занжири-ку. Президент занжирни тезроқ уланг десалар, сизлар узиш билан оворасизлар», — дейди кластер раҳбари.

Кластер раҳбарининг айтишича, 2019 йилда ҳам пахтачилик кластеридан ғалла учун пул сўралган ва олинган. Оқибатда фермерлар кластердан 7 миллиард сўм қарздор бўлган.

«Sulton Tex Group 7 миллиард сўмдан ортиқ қарздорликка эга, дебсиз. Сиз вазирсиз, гапингизни асослаб гапиринг. Нима учун мағзава ағдаряпсиз? Шуни билингки, фермерларнинг Sulton Tex Group’дан 7 миллиарддан ортиқ қарзи бор. Ҳар ҳолда зўравонлик билан бизни қарздормиз дейишга мажбур қилмасангиз керак. Кўчадаги миш-мишларни асосламай, ОАВга тарқатиш яхшимас, вазир жаноблари», — дея вазирга эътироз билдиради Нурбек Эргашев.

Нурбек Эргашев вазирнинг фермерлар кооперациясини тузиш тўғрисидаги гапини чўпчак, деб атади.

«Нима қиласиз оммани чалғитиб, бир оптималлаштирамиз дейсиз, бир кластер, энди кооперация, дейсиз, тутуриқ борми ўзи? Президент қарори билан кластер билан қамраб олинмаган ҳудудларда кооперация ташкил қилинсин, дейилган. Ҳолбуки, Қарши туманида кластер фаолият юритаётган эди-ку?», — дейди кластер раҳбари.

Кластер раҳбари қонунга хилоф ҳаракатлар оқибатида корхона бугунги кунга қадар 10,7 миллиард сўм зарар кўрганини, 490 та яратилган иш ўрини бўш қолганини айтмоқда.

«Sulton Tex Groupнинг кластер фаолиятини тўхтатдингиз, энди қурилган пахта заводи, ёғ заводи, йигирув, тўқув, тикув фабрика, биолаборатория, сифат сертификат лабораторияси, қишлоқ хўжалик техника — агрегатлари пулини ким тўлайди? Мана шу қонунга хилоф ҳаракатлар оқибатида корхона бугунги кунга қадар 10,7 миллиард сўм зарар кўрди, 490 та яратилган иш ўринлари бўш қолди. Ҳаракатларингиз жуда таҳликали, индамаса жиноятчига ҳам чиқариб қўясиз. Чунки банкдан ҳисоб рақам айланмамиз бизни огоҳлантирмасдан олиб текширилмоқда. Нимага эришишмоқчи? Юртимиздаги ҳозирги пандемия шароитидаги синовли кунларда мингга яқин ходимларимизнинг ишлари тўхтаб қолиб, қийналишларини исташяптими? Минг нафар ходим дегани минг оила, беш мингга яқин инсонлар ҳаёти, дегани эмасми? Қанчалик қийин бўлмасин, ишлаб чиқариш ҳажмини, иш ўринларини сақлаб қолган ҳолда ҳали-ҳануз ойига бир миллион доллардан зиёд экспорт қиляпмиз ва юртимизга валюта олиб киряпмиз. Беш мингга яқин инсонлар пандемия даврида ҳаёт кечиришлари учун ёрдам қўлини чўзишга ошиқяпмиз. Гапларимизнинг барчаси асосли, кириб келаётган валюталарни, ташкилий ишларимизни банк ҳам, ҳокимлик ҳам ва бошқа мутасадди ташкилотлар ҳам кўриб туришибди. Ким кўра олмаяпти буларни?», — дейди Нурбек Эргашев.

Нурбек Эргашев суҳбат сўнгида қишлоқ хўжалиги вазирига савол билан юзланади.

«Кластерлик фаолиятимиз, пахта заводи, ёғ заводи, тикув фабрика заводи, биолаборатория, сифат сертификат лабораторияси, қишлоқ хўжалик техника — агрегатлари, барчаси Президент қарорлари асосида ташкил этилган. Шунча иш Президент қарори талабидан келиб чиққан ҳолда бажарилса-да, ҳатто Адлия вазирлигидан ҳам рўйхатдан ўтмаган бош вазир ўринбосари раислигидаги йиғилиш баёни асосида барчаси йўқ қилинмоқда. Энди айтинг-чи, Президент қарори устунми ёки Адлия вазирлигидан рўйхатдан ўтмаган бош вазир ўринбосари йиғилиш баёними?», — дейди кластер раҳбари.

Вазир Sulton Tex Group раҳбарининг матбуот анжумани ташкил қилиб, очиқчасига гаплашиб олиш таклифига нима деб жавоб қайтаради?

«Дарё» воқеалар ривожини кузатишда давом этади.