Украинадаги ўзбекистонликлар Киев—Харьков—Тошкент—Киев чартер рейсида олиб келинади

Транспорт вазирлигининг ахборот хизмати AllTrip.uz компанияси Windrose  авиакомпанияси билан ҳамкорликда Украинадан Ўзбекистонга қайтиш истагида бўлган йўловчилар учун Киев—Харьков—Тошкент—Киев йўналишида чартер қатновини амалга оширишини хабар қилди.

Хабарда қайд этилишича, Киев—Харьков—Тошкент чартер рейси 2020 йилнинг 5 августида амалга оширилиши белгиланган. Тошкент—Киев йўналишидаги чартер парвози 6 август куни амалга оширилади.

Авиачипта нархлари ва парвоз бўйича батафсил маълумотларни +998 78 140 00 00 телефон рақами орқали олишингиз мумкин, дейилади Транспорт вазирлигининг хабарида.

Аввал 31 июлда 144 нафар фуқаро меҳнат фаолиятини амалга ошириш учун Ўзбекистондан Россиянинг Амур вилоятига жўнатилгани, 1 августда Республика махсус комиссиясининг қарорига мувофиқ, хориждаги ўзбекистонликларни олиб келиш учун 2 августдан 16 августга қадар амалга ошириладиган навбатдаги чартер рейсларнинг жадвали тасдиқлангани ҳамда 2 августда Туркиянинг Истанбул шаҳрида 2020 йилнинг 16 ва 30 июль кунлари Turkish Airlines авиакомпанияси томонидан ташкил этилган чартер рейсда 42 нафар ўзбекистонлик йўловчи парвоздан қолиб кетгани ҳақида хабарлар берилганди.