Коронавирусга қарши кураш штаби аъзоси: Касалликнинг ўпка ҳажмига таъсир кўрсатиши оғир кечиши ва ўпканинг жароҳатланишига боғлиқ

Коронавирусга қарши кураш штаби аъзоси Севара Убайдуллаева COVID-19 инфекцияси ўпка ҳажмига таъсир кўрсатиши ҳақидаги саволга аниқлик киритиб ўтди.

«Албатта, ўпка ҳажмига таъсир кўрсатиши, бу касалликнинг қанчалик оғир кечиши ва ўпканинг жароҳатланишига боғлиқ. Чунки ҳозирги кунда Жаҳон соғлиқни сақлаш ташкилоти, бутун дунё ва республикамиз олимлари, касалликни ўрганиш жараёнида ўпкада коронавирус орқали пайдо бўлган пневмонияда кўпроқ алвеолалар қуруқ йўтал билан фиброзга айланиб, унинг ҳажми кичрайишини аниқлаб, таъкидлаб келмоқдалар. Фиброзни МСКТ (мультиспирал компьютер томография) да кўриш мумкин. У орқали ўпканинг неча фоизга зарарлангани, ўпканинг кичрайганини билдиради», — дейди Убайдуллаева.

Шу билан бирга, мутахассис инсон организми тикланувчан хусусиятга эга эканлиги, ўпка алвеолалари бирламчи тўғри даво олиб боришда маълум бир фоизга жароҳатланган бўлса, доимий енгил жисмоний фаоллик ва шифокорларнинг тавсияси асосида нафас машқларини бажариш билан жароҳатланган соҳаларни тиклаш, ўпка ҳажмини кенгайтиришга ёрдам бериши таъкидланди.

Эслатиб ўтамиз, аввалроқ Коронавирусга қарши курашиш штабининг яна бир аъзоси Барно Одилова венага томчилатиб қилинган уколлар (капелницалар) қилиш муолажалари натижасида нафақат ўпкада зотилжам, балки суюқликнинг бирданига кўп миқдорда юборилиши оқибатида ўпка шишиши ҳолатлари ҳам кўп кузатилаётганини қайд этган. Антибиотик ва вирусга қарши препаратларни билиб-билмасдан қабул қилиш орқали организмга бефойда таъсирини қўзғаш, асоратларига учраб қолиш хавфини юзага келтириши яна бир бор таъкидлаганди.