Коронавирусга қарши кураш штаби аъзоси Ҳабибулла Оқилов АОКА залида ўтказилган матбуот анжманида Ўзбекистонда коронавируснинг иккинчи тўлқини ҳали бошланмаганини маълум қилди.
«Иккинчи тўлқин бошланиши учун биринчиси тугаши керак. Биринчи тўлқин қачон тугайди, десак тўғри бўлади. Қачонки охирги бемор клиникадан чиқиб кетгандан кейин бирорта касал қолмаганида биринчи тўлқин тугаган бўлади. Муайян муддатдан кейин янги бемор аниқланса, шунда иккинчи тўлқин дейилади. Шунинг учун иккинчи тўлқин ҳақида гапиришга бизга жуда эрта», — дейди мутахассис.
Шунингдек, Оқилов айни дамда касалланиш динамикаси юқори бўлиб турган вазиятда 15 августдан сўнг карантин чоралари юмшатилиши қанчалик тўғри, деган саволга ҳам изоҳ бериб ўтган.
«15 август ҳақида гапирадиган бўлсак, бизда ҳали салкам икки ҳафта вақтимиз бор. Агар икки ҳафта мобайнида худди шу динамика қайд этилса, яъни ўтган кунларда касаллик қайд этилиши 700 дан ошган бўлса ва бугун 513 тага тушган бўлсак, кейинги кунларда 500, 450 қайд этилиб, шу рақамларда турсак, албатта, 15 августдан кейин юмшатса бўлади. Шундагина таклиф билан Республика махсус комиссиясига чиқишимиз мумкин».
Коронавирусга қарши курашиш штабининг яна бир аъзоси Анвар Алимов эса Оқиловнинг жавобига қўшимча тарзда карантин жорий қилишда касаллик тарқалишининг олдини олиш, касаллик тарқалиши юкламасини соғлиқни сақлаш тизими қанчалик эплай олишини билиш каби жиҳатлар ҳам борлигини қайд этди.
«Соғлиқни сақлаш тизими касалликнинг қанчалик ортишига қарамасдан, қанча бемор бўлган ҳолатда ҳам соғлиқни сақлаш тизими уларни тўлақонли, сифатли даволаш имкониятига эга бўлиши бу энг асосий мезон. Карантин тадбирлари тарқалаётган касалликни эплаб олиш даражаси билан бевосита боғлиқ».
Эслатиб ўтамиз, Ҳабибулла Оқилов 8 июль куни қилган чиқишида Ўзбекистон соғлиқни сақлаш тизимидаги ресурслар «поёнига етгани», бўш койка-ўринлар қолмаганини маълум қилган. 9 июлдаги брифингда эса штаб аъзоси койка-ўринлар, дори захираси мавжудлигини, тизим ҳар қанча беморни қабул қила олишини таъкидлаганди. Ўзбекистон ҳукуматининг 16 июль куни эълон қилган, Тошкент шаҳар ҳокими Жаҳонгир Ортиқхўжаев ва соғлиқни сақлаш вазири Алишер Шодмоновга ҳайфсан бериш ҳақидаги фармойишида эса Ўзбекистонда коронавирус пандемиясининг иккинчи тўлқини кетаётгани таъкидланган эди. Ҳабибулла Оқилов 3 август куни «Ўзбекистон 24» телеканалидаги чиқиши вақтида карантин чоралари юмшатиладиган бўлса, касаллар сонининг ортиб кетиши эҳтимолига мамлакат соғлиқни сақлаш тизими тайёр эканлигини билдирган.
Изоҳ (0)