Американинг Небраска штатида 53 йилдан буён бир-бирини танимаган опа-сингиллар учрашди. Бунга ҳаммани ваҳимага солаётган коронавирус сабаб бўлди, деб хабар берди CNN.
73 яшар Дорис Криппен 2020 йилнинг май ойида хасталаниб қолади. У заифлик, ҳолсизлик туфайли йиқилиб, қўлини синдиради. Афсуски, шифохонага олиб борилган Криппенда коронавирус аниқланиб, 30 кун давомида даволаниш кераклиги айтилади.
Орадан бир ой ўтиб Криппен Фремонт шаҳридаги реабилитация марказига юборилди. Айнан ўша ерда 20 йилдан ортиқ ишлаган синглиси Бев Боро билан учрашди. Боронинг сўзларига кўра, у беморлар рўйхатида Криппен фамилиясини кўриши билан унинг ким эканлигини тахмин қилган.
Боро тахминларини аниқлаштириш учун тахтага отасининг исмини ёзиб, Криппенга кўрсатади. Қулоқларида эшитиш муаммоси бўлган Криппен отасининг исмини кўриб, барчасини тушунди. Опа-сингилларнинг отаси битта, фақат оналари бошқа.
«Бу Худонинг бизга берган яна бир марҳамати, агар реабилитацияга юборилмаганимда, синглимни ҳеч қачон топа олмасдим», – дейди Криппен.
Шунингдек, уларнинг бошқа ака-ука ва опа-сингиллари ҳам бор. Улар аллақачон бир-бирлари билан танишиб, жуда катта оилага айланган.
Изоҳ (0)