Президент Шавкат Мирзиёев 30 июль куни «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги фармонни имзолаган эди. Фармонга кўра, пандемия шароитида моддий ёрдам ва кўмакка муҳтож оилаларнинг рўйхатларига («темир дафтар»га) киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилиши кўзда тутилган.
Шунингдек, Вазирлар Маҳкамасининг тегишли фармойишига асосан ижтимоий ҳимояга муҳтож оилаларга «Саховат ва кўмак» жамғармаси орқали моддий ёрдам тарқатилиши, бунинг учун жами 150 миллиард сўм ажратилиши, нақд пул кўринишидаги моддий ёрдам пулларини икки кун ичида тарқатиб бўлиш лозимлиги ҳақида хабар берилган эди (худди шу фармойиш ижроси доирасида Тошкент шаҳрида 30—31 июль кунлари «темир дафтар»лардаги муҳтож оилаларга жами 25 миллиард сўм тарқатилган.
Шу билан бирга 31 июль оқшомидан бошлаб ижтимоий тармоқларда жойларда аҳоли қатламларига моддий ёрдам пули ажратилиши жараёнида қонунбузилиши ҳолатларига йўл қўйилаётгани ҳақидаги хабарлар, видеолар тарқалди. Бош прокуратура матбуот хизматидан маълум қилишларича, идора томонидан Президент фармони ижросини тўлақонли таъминлаш мақсадида махсус штаб тузилиб, аниқ тадбирлар белгиланган ҳамда ҳудудий прокурорларга алоҳида топшириқлар юборилган.
«Прокуратура органлари томонидан бу борада амалга оширилаётган ишлар, шу жумладан белгиланган пул маблағларининг тўлиқ ва ўз муддатида манзилли етказилиши алоҳида назоратга олинди, қонунбузилиши ҳолатлари аниқланган тақдирда қаътий чоралар кўрилиши таъминланади», — дейилади Бош прокуратура ахборотида. Шу билан бирга, бундай ҳолатлар кузатилган тақдирда фуқаролардан тегишли ҳудуд прокуратурасига мурожаат қилиш сўралган (мурожаат учун телефонлар):
- Андижон вилоят прокуратураси – 74 227-1007
- Бухоро вилоят прокуратураси – 65 221-1007
- Жиззах вилоят прокуратураси – 72 226-1007
- Қашқадарё вилоят прокуратураси – 75 228-1007
- Қорақалпоғистон Республикаси прокуратураси – 61 222-1007
- Навоий вилоят прокуратураси – 79 210-1007
- Наманган вилоят прокуратураси – 69 227-1007
- Самарқанд вилоят прокуратураси – 66 231-1007
- Сирдарё вилоят прокуратураси – 67 235-1007
- Сурхондарё вилоят прокуратураси – 76 223-1007
- Тошкент шаҳар прокуратураси – 71 202-1007
- Тошкент вилоят прокуратураси – 71 230-1007
- Фарғона вилоят прокуратураси – 73 244-1007
- Хоразм вилоят прокуратураси – 62 226-1007
Изоҳ (0)