Самарқанд вилоятининг Тойлоқ тумани прокурори Фарҳод Абдухолиқов вафот этди. Бу ҳақда Бош прокуратура хабар берди.
«Бош прокуратура раҳбарияти ва жамоаси Самарқанд вилояти, Тойлоқ тумани прокурори, адлия маслаҳатчиси Абдухолиқов Фарҳод Мусиновичнинг вафоти муносабати билан марҳумнинг қариндош ва яқинларига чуқур таъзия изҳор этади», — дейилади Бош прокуратура томонидан эълон қилинган таъзияда.
Бош прокуратура матбуот хизмати раҳбари Ҳаёт Шамсуддиновнинг «Дарё»га маълум қилишича, 1962 йилда туғилган Фарҳод Абдухолиқов бир ҳафтадан буён коронавирусдан даволанаётган бўлган. 1 август куни эса ҳаётдан кўз юмган.
Тойлоқ тумани прокурорининг ўлими бўйича ҳозирча Соғлиқни сақлаш вазирлиги ахборот берганича йўқ. 22 июль куни Бош прокуратура матбуот хизмати Ўзбекистон бош прокурорининг собиқ ўринбосари, Қорақалпоғистон собиқ прокурори Ҳакимбай Халимов 66 ёшда коронавирус асоратларидан вафот этганини маълум қилганди. Аммо бу ҳолатни ҳам ССВ шу вақтгача тасдиқламаган.
ССВ ҳисоби бўйича ҳозиргача коронавирусга чалинган 145 киши вафот этган. «Дарё» ҳисоби бўйича Тойлоқ прокурори коронавирус асоратлари оқибатида вафот этган 153-бемор бўлди.
Изоҳ (0)