Австралияда ачинарли аҳволдаги ноёб Ford Falcon 300 минг долларга сотилди

Австралияда 1973 йилда ишлаб чиқарилган ноёб Ford Falcon GT Hard Top купеси сотувга қўйилди. Сўнгги 30 йил давомида ҳаракатсиз турган автомобиль 300 минг долларга баҳоланган, деб хабар беради Motor.

Ўтган давр мобайнида гаражда сақланган автомобилнинг ҳолати яхши эмас. Ford Falcon кузовининг айрим жойлари занглаб кетган ва кўчиб тушган, капот остида ҳам коррозия ўчоқлари мавжуд. Афсонавий купе салони ундан ҳам ачинарли аҳволда. Автомобилнинг пол қисми чириб кетган, ўриндиқлар қалин чанг қатлами билан қопланган, қурилмалар панели ажралиб тушган.

Шунга қарамай, ачинарли аҳволдаги машина эгасининг сўзларига кўра, автомобилнинг барча деталлари оргинал. Бундан ташқари, купега 1973 йил учун ноёб ҳисобланган гидрокучайтирилган руль, кондиционер ўрнатилган ва ойналари қорайтирилган. Мазкур Ford Falcon GT Hard Top Австралияда ишлаб чиқарилган сўнгги махсус версия ҳисобланади. Шундан сўнг, мамлакатда ушбу моделлар оддий йўллар учун жуда хавфли деб топилган.

Ноёб маслкар капоти остидан 380 от кучи ва 513 Нм айланувчи моментга эга 5,8 литрли V8 двигатели ўрин олган. У тўрт поғонали механик узатмалар қутиси ёрдамида бошқарилади. Модель соатига 100 километр тезликка 6,5 сонияда эриша олади, максимал тезлиги 230 км/соат. Одометрга кўра, 47 ёшли Ford Falcon 100 минг километрдан ортиқроқ йўл босган. Сотувчининг таъкидлашича, автомобиль двигатели 1988 йилдан бери ишламайди.

Автомобиль ачинарли аҳволда бўлганига қарамай, у аукционда 300 минг долларга сотилган. Харидор ўзининг кимлиги сир қолишини истаган.