Automobili Lamborghini компанияси Squadra Corse спорт бўлинмаси ва Centro Stile дизанерлари томонидан яратилган энг кучли гиперкарини — Essenza SCV12’ни тақдим этди. Фақатгина пойга йўллари учун мўлжалланган гиперкардан 40 нусха ишлаб чиқарилади, деб хабар беради Motor.
Мазкур янги модель Aventador SVJ базасида яратилган бўлиб, энг кучли Lamborghini мотори — 830 от кучига эга 6,5 литрли V12 атмосфера двигатели билан жиҳозланган. Орқа босимни пасайтиришга хизмат қиладиган тизим машина самарадорлигини яхшилайди.
Штангалар ёрдамида итарилиб турувчи орқа «подвеска» Xtrac олти поғонали узатмалар қутиси картерига бевосита қотирилган бўлиб, у гиперкарнинг пойга вақтида манёвр қилишини ва бардошлилигини оширади. Олд томони 19, орқаси 20 дюймли магнит ғилдирак дискаларига Pirelli шиналари кийгизилган. Тормозлар Brembo’ники.
Essenza SCV12 GT3 классидаги моделлардан пастга босувчи кучнинг катталиги билан фарқ қилади — соатига 250 километр тезликда 1200 килограмм. Машина капотидан худди Huracan’даги каби иккиталик ҳаво айлантиргич ўрин олган бўлиб, у совуқ ҳавони моторнинг ҳаво панжарасига ҳайдаб, радиатордан иссиқлик олиб кетади. Олд қисмига массив сплиттер, орқасига — бошқарилувчи иккита антиқанот ўрнатилган.
Қувватнинг оғирликка нисбати бир килограмм учун 1,66 от кучини ташкил этади — бунга карбондан тайёрланган каркассиз монокок ёрдамида эришилган.
Essenza SCV12’нинг бўлажак эгалари учун Lamborghini штаб-квартираси Сант-Агата-Болонезада алоҳида боксларга эга камерали гараж тайёрлаб қўйган. Махсус илова ёрдамида гиперкарни суткасига 24 соат кузатиш мумкин.
Мавзуга доир: Янги Lamborghini суперкарининг ташқи кўриниши фош этилди
Изоҳ (0)