«Реал» ҳужумчиси Карим Бензема ўзининг YouTube каналида мухлисларнинг бир қанча саволларига жавоб берди.
— Сиз билан бирга ўйнаган энг яхши футболчи ким?
— Бунга жавоб бериш қийин. Криштиану, Кака, Рауль билан бирга ўйнаганман, ҳозир эса Рамос. Аниқ биттасини танлай олмайман.
Карим Бенземанинг «Эль-Класико»лардаги топ-5 голини томоша қилинг (видео)
— Майдондаги позициянгиз қандай.
— Ҳеч қачон ўзим учун аниқ бир позиция белгилашга ҳаракат қилмайман. Мен футболчиман ва дунёнинг энг яхши ўйинчиси бўлишга ҳаракат қиламан.
— «Олтин тўп»ни қўлга киритиш ҳақида ўйлайсизми?
— Албатта, болалигимдан бери. Бироқ бу — мени ҳар куни ақлдан оздирадиган нарса эмас.
— Нимадан кўпроқ афсусланасиз ва нимадан ғурурланасиз?
— Ҳеч нарсадан афсусланмайман. «Реал»даги ғалабаларим билан эса фахрланаман.
— Сиз ёқтирган ўн бир нафар ўйинчи?
— «Реал» таркиби.
— Сиз учун дунёнинг кейинги уч нафар энг яхши ўйинчилари ким?
— Билмадим, чунки футбол жуда тез ривожланмоқда. Сиз бутун мавсум давомида яхши бўлишингиз ва жамоангиз билан унвонларни ютишингиз керак. Битта ўйинда учта гол уриш сизни дунё юлдузига айлантирмайди.
— Чемпионлар Лигасининг тўртта совринини Жаҳон Чемпионатининг битта кубогига алмашасизми?
— Йўқ, ҳеч қачон.
— Сиз дуч келган энг яхши ҳимоячи?
— Рамос ва Варан, мен ҳар бир машғулотда уларга қарши ўйнайман.
— Ким билан ўйнашни хоҳлаган бўлардингиз?
— Бу осон. Роналдо ва Зидан.
— Сизнингча, дунёнинг энг яхши 5 нафар дриблингчиси ким?
— Неймар. Рўйхат тугади.
Маълумот учун, Карим Бензема 2009 йилдан бери «Реал» шарафини ҳимоя қилиб келади. Бунгача у «Лион» сафида тўп сурган. 32 ёшли франциялик футболчи «қироллик клуби» билан шу вақтгача 19 соврин, хусусан 3 марта Испания чемпионлигини ва 4 марта Чемпионлар Лигаси бош совринини қўлга киритган.
Мавзуга доир:
Изоҳ (0)