Ijtimoiy tarmoqlarda soliq organlari hisobot muddatlari va boshqa me’yorlarni buzgan tadbirkorlarni “kunlik jarimalar rejasi”dan kelib chiqqan holda jarimaga tortishni ko‘paytirgani to‘g‘risida xabarlar tarqaldi. Davlat soliq qo‘mitasi matbuot xizmati “jarimalar rejasi” to‘g‘risidagi xabarlar haqiqatga to‘g‘ri kelmasligini ma’lum qildi.
“Ma’muriy choralar hisobot taqdim etish va qonun hujjatlarida belgilangan soliqlarni to‘lash muddatlarini buzgan soliq to‘lovchilarga nisbatan qo‘llaniladi”, — deyiladi xabarda.
DSQ ma’lumotlariga ko‘ra, Soliq kodeksining 111-moddasiga binoan bugungi kunda qo‘mita may oyi uchun QQS soliq deklaratsiyasini taqdim etmagan 3375 ta xo‘jalik yurituvchi subyektlarning bank hisobvaraqlari bo‘yicha operatsiyalarni to‘xtatgan.
Ta’kidlanishicha, 20-iyun dam olish kuniga (shanba) to‘g‘ri kelgani sabab, soliq majburiyatlarini bajarishning so‘nggi muddati — soliq hisobotini topshirish va may oyida budjetga QQS to‘lash — 22-iyunga (dushanba) qoldirilgan.
“Shunga qaramay, 3000 dan ortiq faoliyat yuritayotgan tadbirkorlik subyektlari soliq hisobotlarini taqdim etish va Soliq kodeksining 273-moddasida belgilangan soliqni to‘lash tartibini buzgan holda soliq majburiyatlarini bajarmagan”, — deyiladi xabarda.
DSQning ta’kidlashicha, soliq hisobotlarini o‘z vaqtida taqdim etilmaganligi to‘g‘risida bildirishnomalar soliq to‘lovchilarning shaxsiy kabinetlariga yuborilgan, shuningdek, yuqorida keltirilgan sabablarni ko‘rsatgan holda ularning bankdagi hisobvaraqlari bo‘yicha operatsiyalar to‘xtatilishi mumkinligi to‘g‘risida ogohlantirish yuborilgan.
May oyi bo‘yicha QQS va boshqa bir qator soliqlarni to‘lash bo‘yicha soliq deklaratsiyasini topshirishning barcha muddatlari tugaganligini hisobga olgan holda, Davlat soliq qo‘mitasi soliq to‘lovchilarning majburiyatlarini eslatib o‘tgan.
“Soliq hisobotlari faqatgina Soliq kodeksiga ko‘ra soliq to‘lovchi deb e’tirof etilgan soliqlar bo‘yicha belgilangan muddatlarda taqdim etilishi kerak”, — deyiladi qo‘mita matbuot xizmati xabarida.
Ma’muriy javobgarlik to‘g‘risidagi kodeksning 175-moddasi 1-qismiga binoan foyda (daromad) yoki soliq solinadigan boshqa obyektlarning hisobini olib bormaslik yoxud bunday hisobni belgilangan tartibni buzgan holda olib borish, boshqa majburiy to‘lovlarni hisoblab chiqarish va to‘lash uchun zarur bo‘lgan soliq hisobotlarini, hisob-kitoblarini hamda boshqa hujjatlarni, o‘z vaqtida taqdim etmaslik yoki belgilangan muddatda taqdim etmaslik bazaviy hisoblash miqdorining bir baravaridan uch baravarigacha miqdorda jarima solishga sabab bo‘ladi.
Avvalroq ijtimoiy tarmoqlarda Olmazor tumani ichki ishlar organlari faoliyatini muvofiqlashtirish boshqarmasida bo‘lib o‘tgan majlisdan yozib olingani taxmin qilingan ovozli xabar tarqalgani va ovozning Olmazor tumani IIO FMB Huquqbuzarliklar profilaktikasi boshqarmasi maxsus topshiriqlar bo‘yicha inspektori podpolkovnik Farrux Xolovga tegishli ekani haqida xabar berilgandi. Xolov o‘z bo‘ysunuvchilariga “plan”ni to‘ldirish uchun har kuni 5 tadan ma’muriy bayonnoma tuzishga topshiriq bergan.
Ichki ishlar vazirligi matbuot kotibi Shohrux G‘iyosov esa majburiy “plan” ish uslubidan butkul voz kechilganini ma’lum qilgan.
Izoh (0)