Фарғонада қўшмачи аёлдан пора талаб қилган ИИБ ходими озодликдан маҳрум этилди

Фарғона шаҳар ички ишлар органлари фаолиятини мувофиқлаштириш бошқармаси катта тезкор вакили Дилмурод Абдуллажонов (исм-шарифлар ўзгартирилган) қўшмачи аёлдан пора олаётганида ушланди. Бу ҳақда Жиноят ишлари бўйича Фарғона туман судининг раисига таяниб, «Адолат» газетаси хабар берди.

Маълумотларга кўра, 2020 йилнинг 19 апрель куни Фарғона шаҳар ички ишлар органлари фаолиятини мувофиқлаштириш бошқармаси томонидан «Орият» тадбири ўтказилган. Мазкур тадбирда шаҳарнинг «Янги Аср» кўчасидаги кўп қаватли уйларнинг бирида яшовчи, муқаддам одам савдоси жинояти учун судланган ва жазо муддатини ўтаётган Ш.Ф. ўз уйида фуқароларнинг кўнгилхушлиги учун шароит яратиб, қўшмачилик қилаётгани аниқланган. Шу боис айни ҳолат юзасидан тегишли ҳужжатлар расмийлаштирилиб, терговга юборилган. Натижада Ш.Ф.га нисбатан Жиноят кодексининг тегишли моддалари билан жиноят иши қўзғатилган.

Маълум бўлишича, «Орият» тадбирида бошқарма катта тезкор вакили Дилмурод Абдуллажонов ҳам иштирок этган. Ш.Ф.нинг қадрдонларидан бири унга қўнғироқ қилиб, дугонасига ёрдам беришини илтимос қилган. Натижада Дилмурод Абдуллажонов воқеанинг эртасига — 20 апрель куни Ш.Ф. билан учрашиб, ишни «бости-бости» қилиш учун ундан пора талаб қилган.

Шунингдек, Абдуллажонов кейинги учрашувда қўшмачи аёлни жинсий алоқа қилишга таклиф этади. Ноилож қолган Ш.Ф. эса таклифни қабул қилади. Шундан сўнг тезкор ходим ҳафта-ўн кун ичида Ш.Ф.нинг уйида бир неча марта кўнгилхушлик қилган.

Ш.Ф. ўзининг чорасиз вазиятидан фойдаланиб қолмоқчи бўлаётган қонун ҳимоячисининг сўнгги кунлардаги ҳаракатларидан шубҳаланади ва унга қонуний чора кўришни сўраб, ДХХ Фарғона вилоят бош­қармасига мурожаат қилади. Оқибатда 3 май куни Дилмурод Абдуллажоновга нисбатан тезкор тадбир ўтказилади.

Тадбир давомида Абдуллажонов Ш.Ф.дан 500 АҚШ долларини олганида ушланган. Унга нисбатан Жиноят кодексининг 168-моддаси 3-қисми «а»банди, 28, 211-моддаси 1-қисми (Фирибгарлик, Жиноят иштирокчиларининг турлари, Пора бериш) билан жиноят иши қўзғатилган. Жиноят ишлари бўйича Фарғона туман суди эса айбдорни озодликдан маҳрум қилиш жазосига маҳкум этди.