Жиноят ишлари бўйича Миробод туман судида Straus House МЧЖ таъсисчиси ва масъул раҳбарларига нисбатан ўтказилган суд жараёнлари якунига етди. Бу ҳақда Олий суд матбуот хизмати хабар берди.
Маълум қилинишича, И.Исроилов (Straus House МЧЖ таъсисчиси, 1993 йилда Тошкент шаҳрида туғилган), А.Маҳмудалиев (Straus House МЧЖ директори, 1995 йилда Тошкент вилоятида туғилган), Д.Қутпиддинов (Straus House директори ўринбосари, 1994 йилда Тошкент вилоятида туғилган) ва О.Саидов (Straus House бош ҳисобчиси, 1961 йилда Тошкент шаҳрида туғилган) га нисбатан жиноят ишини кўриб чиқиш бўйича суд жараёни ниҳоясига етган ва суд ҳукми эълон қилинган.
Ушбу жиноий иш жиноят ишлари бўйича Миробод туман суди судьяси О.Илҳомжонов раислигида кўриб чиқилган.
Эълон қилинган суд ҳукмига кўра, И. Исроилов Жиноят кодексининг 238-моддаси (Ёлғон гувоҳлик бериш) 3-қисмининг «а» банди билан оқланиб, Жиноят кодексининг 168-моддаси (Фирибгарлик) 4-қисмининг «а», «в» бандлари, 184-моддаси (Солиқлар ёки бошқа мажбурий тўловларни тўлашдан бўйин товлаш) нинг 3-қисми, 189-моддаси (Савдо ёки хизмат кўрсатиш қоидаларини бузиш) нинг 1-қисми, 243-моддаси (Жиноий фаолиятдан олинган даромадларни легаллаштириш) ва 227-моддаси (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисмининг «а» бандида назарда тутилган жиноятларни содир этганликда айбли деб топилди. Унга узил-кесил ўташ учун 9 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
А.Маҳмудалиев Жиноят кодексининг 168-моддаси 4-қисмининг «а», «в» бандлари, 184-моддасининг 3-қисми, 189-моддасининг 1-қисми ва 227-моддаси 2-қисмининг «а» бандида назарда тутилган жиноятларни содир этганликда айбли деб топилиб, унга узил-кесил ўташ учун 7 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Д.Қутпиддинов Жиноят кодексининг 168-моддаси 4-қисмининг «а», «в» бандлари, 184-моддасининг 3-қисми, 189-моддасининг 1-қисми ва 227-моддаси 2-қисмининг «а» бандида назарда тутилган жиноятларни содир этганликда айбли деб топилиб, унга узил-кесил ўташ учун 8 йил-у 5 ой 26 кун муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
О.Саидов Жиноят кодексининг 168-моддаси 4-қисмининг «а», «в» бандлари, 184-моддасининг 3-қисми, 189-моддасининг 1-қисми ва 227-моддаси 2-қисмининг «а» бандида назарда тутилган жиноятларни содир этганликда айбли деб топилиб, унга узил-кесил ўташ учун 5 йил муддатга озодликни чеклаш жазоси тайинланди.
Жиноят иши юзасидан хатланган мол-мулк тегишли тартибда жабрланувчиларга нисбатан етказилган зарарлар ўрнини пропорсионал тартибда қоплаш учун қаратилиши, судланувчилар И.Исроилов, А. Маҳмудалиев, Д.Қутпиддинов ва О.Саидовдан солидар тартибда тегишли тартибда давлат фойдасига 222 386 043 сўм ундирилиши белгиланди.
И.Исроиловдан «Эъзоз махс» ва «CFS мах» МЧЖларнинг фаолияти юзасидан жабрланувчиларга етказилган моддий зарар ундирилади.
И.Исроилов, А.Маҳмудалиев, Д.Қутпиддинов ва О.Саидовдан солидар тартибда Straus House МЧЖнинг фаолияти юзасидан жабрланувчилар фойдасига етказилган моддий зарар миқдори ундирилиши белгиланди.
«Жиноят иши юзасидан ИИВ ҳузуридаги Тергов департаментининг АТИБ «Ипотека банк» Меҳнат филиали ҳисоб рақамида сақланаётган ҳамда хатланган Покистоннинг Chemikals & Marbels Lahore Pakistan компаниясига туяқуш жўжаларини сотиб олиш мақсадида шартномага асосан кўчирилган 1 854 000 000 сўм миқдоридаги пуллар тегишли тартибда етказилган моддий зарарларни қоплашга пропорсионал тартибда қаратилиши белгиланди», — дейилади хабарда.
Мазкур жиноий иш бўйича судга раислик қилувчи томонидан судланувчиларга ва бошқа томонларга ҳукм устидан шикоят қилиш тартиби ва муддати тушунтирилган.
Февраль ойида Straus House жабрланувчилари тергов тугаганига қарамай, суд бошланмаётганидан норози бўлиб, ҳукуматдан ёрдам сўраб Вазирлар Маҳкамаси олдида тўпланган эди. Унгача, Ички ишлар вазирлиги Straus House’дан жабрланганларни ҳудудлардаги тергов бўлимларига мурожаат қилишга чақирган.
Эслатиб ўтамиз, МЧЖ мансабдорлари жами 16,1 миллиард сўм миқдордаги тўловларни жамиятнинг банкдаги ҳисоб рақами орқали қабул қилган. Аммо белгиланган муддатда умумий 319 нафар шахсга туяқуш жўжаларини етказиб бермасдан 7,2 миллиард сўмни ўз эҳтиёжларига сарфлаб юборган.
Изоҳ (0)