Самарқанд вилоятида дори-дармон захирасини яратиш учун 4 миллиард сўм маблағ ажратилган. Ҳозирда коронавирусга чалинган беморларни даволаш учун 65 турдаги икки ойлик дори захираси мавжуд. Бу ҳақда Самарқанд вилояти ҳокими Эркинжон Турдимов иштирокидаги онлайн брифингда маълум қилинди, дея хабар берди «Дарё» мухбири Фарҳод Норбўтаев.
Таъкидланишича, вилоят захирасига қўшимча улгуржи дори сотиш билан шуғулланувчи тадбиркорлар томонидан 2020 йил 1 августга қадар яна 30 миллиард сўмлик дори воситалари олиб келинади. Бу борада вилоятдаги 52 та улгуржи дори-дармон билан шуғулланадиган фирмалар билан вирусга қарши асосий 12 турдаги дориларни олиб келиш бўйича келишиб олинган.
Эркинжон Турдимовнинг айтишича, ҳозирги кунда вилоятда коронавирус касаллигига чалинган беморларни даволаш учун қуввати 1800 ўрин бўлган 11 та шифохона ташкил қилинган. Шунингдек, 10500 та захира жой тайёрланган. Уларнинг 5560 таси Самарқанд шаҳрида жойлашган.
«Туман ва шаҳар тиббиёт бирлашмаларидаги 495 ўринли юқумли касалликлар бўлимлари ҳам шай ҳолга келтириб қўйилган. Шифохоналарнинг барчасида кислород таъминоти тизими мавжуд. Самарқанд шаҳрида Олимпия захиралари тайёрлаш мажмуасида 1080 ўринли шифохона ҳозирланмоқда. Бу жой уч-тўрт кунда тайёр ҳолатга келтирилади. Булардан ташқари Каттақўрғон шаҳри, Каттақўрғон, Иштихон, Нарпай, Пахтачи туманларидаги беморларни даволаш учун Каттақўрғон шаҳрида шифохоналар ташкиллаштиришга эътиборни қаратяпмиз. Яқин кунларда ушбу ҳудудларга алоҳида таҳлил учун ПЗР лабораторияси ўрнатилади. Ҳозир тайёрлаш ишлари кетяпти», – деди вилоят ҳокими.
Ҳокимнинг қўшимча қилишича, Каттақўрғон шаҳридаги ҳарбий қисмда 400 ўринли, «Марварид» санаторийсида 200 ўринли, шаҳарнинг собиқ туғруқхонасида 200 ўринли – жами 800 ўринли шифохона тайёрланмоқда. Марказлашган тартибда аҳолининг талабини қондириш мақсадида COVID-19’га анализ топшириш учун яна қўшимча 96 таликдан 4 та ПЗР лаборатория олиб келиш бўйича буюртма берилган. Марказлашган тартибда яқин кунларда 4 та лаборатория станцияси қўшимча равишда ўз фаолиятини бошлайди.
«Бугунги кунда касалларга шароит яратиш мақсадида ўтган ҳафта 500 дона кислород баллонлари олиб келинди. Соғлиқни сақлаш бошқармаси қошида битта кислород станциясини қуриш ишлари бошланди. Янги ташкил этиладиган шифохона ва лаборатория Каттақўрғон шаҳри, Пахтачи, Нарпай, Каттақўрғон ва Иштихон туманлари аҳолиси учун хизмат қилади», — деди Эркинжон Турдимов.
Брифингда маълум бўлишича, Пастдарғом туманида 1000 ўринли карантин ҳудуди ишга туширилган ва чартер рейс билан Владивосток ва Санкт-Петербург шаҳарларидан 450 нафар фуқаро олиб келиниб, карантин марказига жойлаштирилган. Ҳозирда яна 500 нафар фуқаро Россиядан олиб келиниши кутилмоқда.
Қайд этилишича, Самарқанд шаҳрида 11 та, туманларда 16 та врач-инфекционист, эпидемиолог ва умумий амалиёт шифокорларидан ташкил топган 27 та мобил бригада фаолият юритмоқда. Ҳар бир мобил бригада махсус автотранспорт ва ҳимоя воситалари билан тўлиқ таъминланган.
Изоҳ (0)