Самарқанд ҳокими вилоятдаги шифокорлар уч ойлаб уйига бормай, коронавирус беморларини даволаётгани ҳақида гапирди

Самарқанд вилоятида уч ойдан буён уйига бормасдан, коронавирусга чалинган беморларни даволаётган шифокорлар бор. Бу ҳақда вилоят ҳокими Эркинжон Турдимов иштирокидаги брифингда маълум қилинди, дея хабар берди «Дарё» мухбири.

Ҳокимнинг маълумот беришича, ана шундай жонкуярлардан бири — Самарқанд вилоят юқумли касалликлар шифохонаси шифокори Абдусодиқ Боймирзаев.

«Вилоят юқумли касалликлар шифохонаси шифокори Абдусодиқ Боймирзаев уч ойдан буён уйига бормасдан, беморларга шифо улашмоқда. Буни фидойиликнинг ёрқин намунаси, деб биламан. Фурсатдан фойдаланиб, барча шифокорларга яна бир карра чуқур миннатдорчилик билдираман. Халқимиз ҳам сизлардан миннатдор. Албатта, тушуниб-тушунмасдан тиббиёт ходимларига тош отаётганлар учраб турибди. Булар ҳам ўткинчи. Улардан ҳам хафа бўлманг. Сиз бугун халқимизнинг дардига малҳам бўляпсиз, азизлар. Биз сиздан миннатдормиз», — дейди вилоят ҳокими.

Вилоят ҳокимининг таъкидлашича, шифокорларга зарур шароит яратиб берилмаса-да, улар бор имкониятдан ҳам унумли фойдаланмоқда.

«Олдин ҳам айтганман, бугун ҳам айтаман. Сиз бугун мана шу жараённинг, яъни фронт деб айтадиган бўлсак, унинг олди қаторида турибсиз. Коронавирус пандемияси инсониятни тиз чўктирди. Энг ривожланган давлатлар, Европа тиббиёти ҳам коронавирус пандемияси зарбасига дош беролмасдан силкиниб олди, кўплаб камчиликларга дучор бўлди. Албатта бизнинг тиббиётимиз ҳам бундан холи эмас, етарли камчиликлар бор. Лекин гап тиббиёт тўғрисида эмас, гап шифокорларимиз тўғрисида кетяпти. Албатта, шифокорларимиз ҳақиқий мардлик, жасорат намунаси бўлмоқда», — дейди Эркинжон Турдимов.

Эркинжон Турдимовнинг маълум қилишича, вилоятда COVID-19 билан боғлиқ мурожаатларини қабул қилиш мақсадида 2020 йил 20 апрелдан бошлаб йўлга қўйилган Call-марказга шу кунгача 5 мингга яқин мурожаат келиб тушган. Шунингдек, 20 июлдан бошлаб марказ 1105 қисқа рақами билан ўз фаолиятини қайта бошлаган, операторлар сони ҳам 7 нафардан 20 нафарга ошган. Марказга илгари кунига 55-60 та мурожаат бўлган бўлса, ҳозирда эса 500 дан ортиқ мурожаат тушмоқда. Ушбу мурожаатларнинг 60 фоизга яқини тез тиббий ёрдамга муҳтожлиги сабабли 103 қисқа рақамига йўналтирилмоқда. Қолаверса, 1105 билан 103 рақамининг бир-бирига алоқаси ҳам тикланиб, марказга келиб тушган мурожаатларга Самарқанд тиббиёт институтининг етакчи мутахассислари, психологлари ва волонтёр талабалар гуруҳи кеча-ю кундуз жавоб бермоқда.

Қўшимча қилинишича, марказ қошида онлайн поликлиника фаолияти ҳам йўлга қўйилган бўлиб, инфекционист, умумий амалиёт шифокорлари, реаниматолог ва тор соҳа мутахассислари ўзларининг фойдали маслаҳатларини бериб келмоқда.

Ҳокимнинг айтишича, 103 га айни кунда кунига 3200 тагача қўнғироқ бўлмоқда. 26 июль куни 3248 та мурожаат бўлган бўлса, шундан 780 таси Самарқанд шаҳри аҳолисидан тушган. Июль ойи бошида вилоятда тез ёрдам машиналари сони 280 тани ташкил қилган. Айни кунга келиб эса уларнинг сони 363 тага етказилган. Ўтган ҳафтанинг ўзида 83 та Damas сотиб олинган. Жиззах шаҳридаги Volkswagen заводида ишлаб чиқарилаётган тез ёрдам машиналаридан 10 тасини сотиб олиш бўйича шартнома имзоланган. Шунингдек, санитария-эпидемиологик осойишталик маркази ва давлат санитария-эпидемиология назорати бошқармасининг барча туман ва шаҳар бўлимлари ҳам Damas билан таъминланган.