Фарғона вилояти ИИБ ахборот хизмати Вазирлар Маҳкамасининг 747-сонли қарорига асосан махсус dyhxx.ejarima.uz сайти ташкил этилиб, фуқароларнинг йўлларда ҳаракат хавфсизлигини таъминлашдаги ўрни оширилгани, 43 нафар кўнгилли ҳайдовчиларнинг автомобилларига видеорегистраторлар ўрнатилганини маълум қилди.
Хабарда қайд этилишича, ушбу қурилмалар ёрдамида 6285 та қоидабузарлик аниқланган. Қоидабузар ҳайдовчиларга 1 миллиард 797 миллион 949 минг 500 сўм миқдоридаги жарималар белгиланган.
«Фарғона вилояти ИИБ кўнгилли ҳайдовчиларга яна 50 дона видеорегистратор қурилмалари тарқатилиши режалаштирилмоқда», – дейилади ахборотда.
Бошқарма ахборотида қоидабузарликлар қайси давр оралиғида қайд этилгани, хусусан, қарийб 1,8 миллиард сўм жарималар қайси оралиқда белгилангани ҳақида маълумот берилмаган.
Аввалроқ Фарғона вилояти Учкўприк туманида 16 ёшли ўсмир бошқарган Lacetti’нинг ағдарилиши оқибатида 14 ёшли йўловчи ҳалок бўлгани, Марғилон шаҳрида Damas ва пиёда ўртасида содир бўлган ЙТҲ оқибатида фуқаро ҳалок бўлгани, Фарғона вилоятининг Учкўприк туманида иккита Damas иштирокида йўл транспорт ҳодисасида ҳайдовчилардан бири ҳаётдан кўз юмгани ҳақида хабарлар берилган.
Изоҳ (0)