Тошкент вилоятида 6 метрли қудуқ ичида қолиб кетган икки киши қутқариб олинди. Бу ҳақда ФВВ матбуот хизмати хабар берди.
Маълумотларга кўра, Тошкент вилояти Тошкент тумани «Бунёдкор» маҳалласи Янги Зарбулоқ кўчасида яшовчи А.А. исмли фуқаро ўз хонадонининг дарвозаси олдидаги оқова сув учун мўлжалланган чуқурлиги 6 метрли қудуққа тушиб, унинг ичидаги ёғочларни олиб чиқишга уринган.
Қудуқ тубида кислород етарли бўлмаганлиги сабабли А.А.нинг соғлиғи ёмонлашиб қолган, шунингдек, унга ёрдам бериш учун қудуққа тушган Б.У. нинг ҳам аҳволи оғирлашган.
Қудуқ ичидан ёрдам сўраб келаётган овозни эшитган А.А.нинг ўғли зудлик билан қутқарув хизматига қўнғироқ қилган.
Воқеа жойига етиб келган қутқарувчилар қудуқ ичида ҳушини йўқотаёзган икки нафар фуқарони юқорига олиб чиқиб, уларга зарур ёрдамни кўрсатган.
Изоҳ (0)