22 июль куни Фарғона шаҳрида машинаси жарима майдонига олиб кирилган фуқаро бунга норозилик тариқасида ўз жонига қасд қилишга уринди. Бу ҳақда вилояти ИИБ ахборот хизмати хабар берди.
Маълум қилинишича, 22 июль куни соат 16:30 ларда Lacetti автомобилини бошқариб келаётган 33 ёшли фуқаро Н.Ю. Тошлоқ туманидан Фарғона шаҳрига кириш қисмида ўрнатилган блокпостда ИИБ ходимлари томонидан тўхтатилган.
Транспорт воситасини рухсат этилмаган вақтда бошқариб юргани, тегишли стикери йўқлиги учун Н.Ю.га нисбатан белгиланган тартибда маъмурий баённома расмийлаштирилган ва Lacetti Фарғона шаҳридаги жарима майдончасига олиб кирилган. Ҳайдовчи бундан норози бўлиб, жарима майдончаси ҳудудидаги арча шохига арқондан (ўз машинаси юкхонасида тиркама учун сақлаб келинган арқон) сиртмоқ ясаб, ўзини осишга уринган.
«Ўша жойда бўлган Миллий гвардия ходимлари ва бошқаларнинг ўз вақтида қилган ҳаракатлари натижасида кўнгилсиз ҳолатнинг олди олинди», — дейилади хабарда.
Н.Ю.нинг танасида ҳеч қандай жароҳат ҳамда соғлиғида бузилишлар аниқланмаган.
Айни пайтда Фарғона шаҳар прокуратураси томонидан ҳолат бўйича терговга қадар текширув ҳаракатлари олиб борилмоқда.
Фарғона вилояти ИИБ хабарида таъкидланишича, 21 июль куни коронавируснинг кириб келиши ва тарқалишининг олдини олиш бўйича вилоят идоралараро мувофиқлаштирувчи штаби томонидан қабул қилинган баёнга асосан, туман, шаҳар ҳокимликлари, вилоят бошқарма ва ташкилотлари томонидан автотранспорт воситаларини ҳаракатланиши учун жорий этилган барча турдаги рухсатномалар, рўйхатлар, маълумотномалар ва стикерлар (Давлат хизматлари агентлиги томонидан берилган стикерлар бундан мустасно) 22 июль кунидан бекор қилинган.
Эслатиб ўтамиз, Республика махсус комиссиясининг қарорига асосан 10 июлдан 2020 йил 1 августга қадар республика миқёсида автотранспорт воситаларининг ҳаракати чекланган. Махсус рухсатномасиз (стикерсиз) фақатгина куннинг муайян вақтида (07:00 дан — 10:00 гача, 17:00 дан — 20:00 гача) фуқароларнинг иш жойига бориб-келиши, дори воситалари, озиқ-овқат ва биринчи галдаги маҳсулотларни харид қилиши учун ҳаракатланишга рухсат берилади.
Изоҳ (0)