Молия вазирлиги Инқирозга қарши курашиш жамғармасининг даромад ва харажатлари ҳақида маълумот берганди. Қонунчилик палатаси депутати Расул Кушербаев ушбу жамғарма харажатларининг катта қисми монополияларга ажратилганига эътибор қаратди ва бунга ўз муносабатини билдирди.
Депутат коронавирусга қарши кураш тадбирлари учун мамлакат бўйича 907 миллиард, шифохона ва карантин мажмуаларини қуриш ва жиҳозлаш учун жами 684 миллиард сўм ажратилган бир вақтда, ссуда тариқасида Uzbekistan Airways’га 406 миллиард, Uzbekistan Airpots’га 101 миллиард, «Биринчи резинотехника заводи» МЧЖга 40 миллиард, «Ҳудудий электр тармоқлари»га 250 миллиард, шунингдек, «Ўзбекнефтгаз»га субсидия ҳисобида 401 миллиард, «Иссиқлик эелектр станциялари»га эса 500 миллиард, сўм миқдоридаги маблағлар ажратилганини қайд этиб, «Бир нечта монополистга ажратилган маблағ жами коронавирусга қарши кураш учун ажратилаётган маблағдан ҳам кўп. Бу инсофсизлик эмасми?», — деб айтди.
«Истеъмолчи сифатида халқимизга танлов имкониятини бермайдиган ҳурматли монополчиларимизни фаолиятидан одамларимиз шу кунга қадар рози бўлиб келганда ҳам алам қилмасди. Айтинг қайси биридан биз розимиз: дунёда нефть нархи минус даражага тушган вақтда ҳам бензин нархини бир икки ҳафтага номига тушириб, яна қайтариб қўйган ‘ўйинчи’ ‘Ўзбекнефтгаз’данми, билет нархлари осмон, сифати паст Uzbekistan Airways номли ҳаво йўллариданми ё жойларда нормал чироқ ёқиб ўтиришдан ҳам маҳрум қилаётган электр тармоқлариданми?», — дейилади депутат муносабатида.
«Мана монополиянинг оқибати: улар давлат ва халқни танасидаги зулукдек ўлгунча сўришади, халқ кулса ҳам ўлса ҳам улар доимо юк, миллионлаб одамлар бир нечта ‘эркатой’ни боқишга маҳкум бўлади. Шу сабаб, давлат бу зулуклардан кечиб майдонни мард, ҳалол, масъулиятли рақобатчиларга тезроқ бўшатиб бериши керак», — дея хулоса қилди Расул Кушербаев.
Энергетика вазирлиги унинг бу муносабатига жавоб қайтарди
Вазирлик «Ўзбекнефтегаз», «Иссиқлик электр станциялари» ва «Ҳудудий электр тармоқлари» учун ажратилган субсидия шаклида давлат ёрдами кўрсатилганлигини истеъмолчиларни, биринчи навбатда Ўзбекистон аҳолисини мунтазам равишда сифатли газ ва электр энергияси билан таъминлаш зарурияти билан изоҳлади. Шунингдек, ушбу маблағларнинг ажратилиши тўғрисидаги қарор Президент қарорига асосан махсус комиссия томонидан қабул қилинганлигини қайд этди.
«Маълумки, электр ва газ таъминоти соҳалари барқарор фаолият юритиши учун катта моддий харажатлар талаб қилинади. Бу энг аввало, ҳар кунлик жараён билан боғлиқ бўлиб, унда улкан саноат занжири иштирок этади. Ушбу занжир таркибида электр энергия ишлаб чиқарувчи, ер қаъридан газ олувчи, уни етказиб бериш, тақсимлаш билан, айни пайтда газ ва электр таъминоти тизимларининг ҳолатини кузатиш билан шуғулланувчи компаниялар мавжуд.
Бундан ташқари, ҳар йили ёз фаслида бу соҳада бутун тизимни куз-қиш мавсумига тайёрлаш, йилнинг совуқ фаслида узулишларга йўл қўймаслик мақсадида қўшимча ишлар олиб борилади», — дейилади вазилик жавобида.
Шунингдек, Энергетика вазирлиги, карантин даврида Ўзбекистон аҳолисини ижтимоий қўллаб-қувватлаш мақсадида электр энергия ва газ таъминотидан уларнинг истеъмоли учун ўз вақтида ҳақ тўламаганларни тармоқдан узмаслик тўғрисида қарор қабул қилинганлиги ва тизимнинг фаолият юритиши учун зарур бўлган маблағлар билан уларнинг истеъмоли учун келиб тушаётган маблағлар ўртасида узулиш вужудга келганлигини, таъкидлади.
«Айни пайтда, тўловлар билан боғлиқ вазият яхшилангач, давлат томонидан соҳани қўллаб-қувватлашга ажратилган маблағлар бюджетга қайтарилади», — дейилади хабарда.
Энергетика вазирлиги «депутат Расул Кушербаевнинг баландпарвоз фикрларни билдиришдан аввал ўзи тилга олган тузилмаларга мурожаат қилган тақдирда, у шубҳасиз тегишли жавобларни олган бўлар эди. Масъулияти шахслар томонидан билдириладиган фикрлар масаланинг моҳиятини яхши билишга асосланиши керак. Бунинг натижасида фақат асоссиз даъволарга ўрин қолмас эди», — дея таъкидлади.
Вазирлик пандемия даврида иқтисодиётни қўллаб-қувватлаш бўйича чоралар дунёнинг барча мамлакатларида, жумладан, Европа комиссияси, АҚШ ҳукумати ва бошқа мамлакатлар ҳукуматлари томонидан қабул қилинаётганлигини эслатди.
Аввалроқ Кушербаев UzAuto Motors’нинг тез ёрдам хизмати учун Damas’ларни ҳам оширилган нархда сотаётганини танқид қилган, «Ўзавтосаноат» унинг танқидига жавоб қайтарган, депутат эса «сиз барибир монопол ва номард иштирокчи сифатида қолаверасиз», деб жавоб берганди.
Изоҳ (0)