Андижон вилояти ҳокими Шуҳрат Абдураҳмонов кучайтирилган карантин сабаб 4200 та тадбиркорлик субъекти фаолиятини тўхтатганини ва натижада 12705 нафар фуқаро ишсиз қолганини айтди. Бу ҳақда ҳоким иштирокидаги брифингда қатнашган «Дарё» мухбири хабар берди.

Таъкидланишича, карантиндан аввал вилоятда 28 мингдан ортиқ тадбиркорлик субъектлари мавжуд бўлган. Карантин эълон қилинган биринчи даврда шулардан 12 мингтаси фаолиятини тўхтатган бўлса, 10 июль кунидан кучга кирган кучайтирилган карантин сабаб 4200 та сартарошхона, ошхона, тўйхона ва буюм дўконлари яна фаолиятини тўхтатган.

«Олдингиси билан солиштириб айтаман. Боиси, биз иккита кучайтирилган карантин даврини ҳам, юмшатилган даврини ҳам бошимиздан ўтказдик. Ҳозир эса иккала шароитга ҳам мослашган ҳолда ишлаяпмиз. Андижонда 28 мингдан ортиқ тадбиркорлик субъекти фаолият юритар эди. Олдинги кучайтирилган карантин даврида салкам 12 мингтасини тўлиқ ёпганмиз. Ҳозирги даврда эса 4200 таси фаолиятини тўхтатган. Булар ошхона, тўйхона, сартарошхона ва бошқалар. Олдинги карантинда қурилиш ташкилотлари, айрим ишлаб чиқариш корхоналарини ҳам ёпган эдик. Лекин ҳозир уларни ёпганимиз йўқ. Бу сафар асосан касалликни тарқатиш хавфи юқори бўлган жойларга эътибор қаратдик. Мисол учун ошхоналар. Чунки уларнинг қулф-калити йўқ, ҳар хил одамлар тўпланади. Бугун сиз кирасиз, эртага мен, индинга яна бошқаси. Уларнинг қайси бири касаллигини ҳеч ким билмайди. Саноат корхоналарида ҳам одамлар тўпланади-ку, деб кимдир айтиши мумкин. У ерга доимий ишлайдиган одамлар келади. Улар кунлик гигиена талабларига риоя қилишга мажбур. Тўйхона, кафе ва чойхоналарда эса бундай қилиб бўлмайди. Таксичиларда ҳам шундай аҳвол. Бунақа оғир шароитда ҳам иқтисодий кўрсаткичларимиз орқага кетгани йўқ», — деди вилоят раҳбари.

Ҳокимнинг қайд этишича, карантин сабабли ишсиз қолган фуқаролар эътибордан четда қолмаган.

«Ишсиз қолганлар қийналмаслиги учун ‘Саховат ва кўмак’ жамғармасига мурожаат қилиши мумкин. Уларнинг мавсумий ишлаши учун етарли шароитлар яратилмоқда. Иш жойини йўқотиб қийналаётган фуқароларимиз бўлса, ижтимоий тармоқлар ёки Call-марказлар орқали мурожаат қилишлари мумкин. Мурожаатларни шахсан секторлар раҳбарлари эшитади ва амалий ёрдам беради. Қўлимиздан келган барча ҳаракатни қиламиз. Агар халқимиз қийналмаса, мен президентимиз айтган вазифани бажарган ва ойлигимни ҳам ҳалоллаб олган бўламан», — деди Шуҳрат Абдураҳмонов.