Олий Мажлис Қонунчилик палатаси депутати Расул Кушербаев «Ўзавтосаноат» компанияси тез ёрдам учун автомобилларни оширилган нархларда сотаётганини танқид қилган эди. Ўз навбатида «Ўзавтосаноат» Расул Кушербаевнинг сўзларига жавоб қайтарган. Шундан сўнг, депутат «Ўзавтосанот»га қарши навбатдаги баёнот билан чиқди.
Дастлаб Кушербаев UzAuto Motors тез ёрдам машиналари оширилган нархда етказиб берилаётганини танқид қилган эди. Бунга «Ўзавтосаноат» компанияси жавоб баёноти берган (UzAuto Motors «Ўзавтосаноат» тизимидаги корхона ҳисобланади), бироқ компания баёноти унинг ўз каналларида эмас, балки UzAuto Motors саҳифаларида эълон қилинган. Катта эҳтимол билан, ушбу ҳолат тушунмовчилик келтириб чиқарган ва депутат ўзининг эътирозига қайтарилган жавобни «Ўзавтосаноат»ники эмас, UzAuto Motors’ники деб ҳисоблаган кўринади:
Мен кечаги фикримда учта фактни келтирганман. Булар:Аввал Тошкент шаҳри ҳокимлиги ва Соғлиқни сақлаш вазирлиги тиббий ускуналар ва тиббий мақсадда фойдаланиш учун Damas автомобилларини сотиб олгани хабар қилинганди. Шунингдек, 2020 йил 3 июлда Ўзбекистонда Isuzu D-Max пикаплари негизида тез ёрдам машиналари ишлаб чиқарилиши, 7 июлда Ўзбекистон коронавирусга чалинган беморлар учун яна 15 та янги реаномобил харид қилингани, 20 июлда эса Жиззахда ишлаб чиқарилган Volkswagen Caddy негизидаги тез ёрдам автомобиллари Тошкентга юборилиши ҳақида хабарлар берилган.UzAuto Motors айтингчи, буларнинг қайси бири ёлғон?
- UzAuto Motors’нинг оширилган, яъни шу йил март ойида бутун халқни норози қилиб кўтариб олган нархда ҳатто тез ёрдам учун ҳам Damas автомобилларини сотаётганлиги;
- Россиянинг Уфа каби шаҳрида кўп миқдордаги автомобиллар очиқ осмон остида ташландиқ туриб қолса ҳам Ўзбекистон халқи ўзимизда қиммат, «дефектли» ва қийин шартларда автомобиллар сотиб олишга мажбур бўлаётганлиги;
- UzAuto Motors халққа танлов имкониятини бермайдиган монополист бўлиб яшаб келаётганлиги.
Депутат қандай бўлиши кераклиги ҳақида ўзингиз тушунмайдиган гаплар билан ҳаммани чалғитиб, қонунларни ўзгартириш депутатлар қўлида-ку, деб ўзингизни оқламоқчи бўлибсиз. Асосий эътироз — сизнинг монополист бўла туриб, халқ фикри билан ҳисоблашмаслигингизда.
Энди агар компанияда юристлар бўлса яхшилаб қонунчиликни ўқисин: сизга монопол ҳуқуқни парламент бермаган, сиз Президент ва ҳукумат қарорлари билан бу имтиёзларга эга бўлгансиз ва шулар ортида «беркинмачоқ» ўйнаяпсиз. Бу ерга «ҳомийлик иши» деб бошқа ишларни тиқиштириб гапни олиб қочманг. Агарки вақти келиб парламентга сизни ваколатларингизни қонун билан тартибга солишнинг имконияти берилса, халқ вакиллари халқ фикридан келиб чиқиб, қарор қилади. Бунга шубҳа қилманг!
Лекин ҳозир сизга халқ фикри қизиқмас. Агар қизиқ бўлганида март ойида қилган ишингиз — монопол бўла туриб бутун халқни норози қилиб автомобиль нархларини бунчалик оширмасдингиз, тез ёрдам учун Damas’ларингизни оширилган нархда халқингизга сотмасдингиз.
Сизга ҳомийлик қилмадинг, деб бошқа ишларни сўрамадик. Ким қўлидан нима келса қиляпти, сиз эса қурбингиз етадиган жойида қаттиқлик қиляпсиз.
Мени популист, нопрофессионал, ёлғончи, кўр, кар, гўл дейсизми ёки кимларгадир шикоят қиласизми фарқи йўқ. Мен сиз ҳақингизда кўпчиликка маълум ҳақиқатни айтавераман: сиз ичкарида барибир монопол ва номард иштирокчи сифатида қолаверасиз. Тўғри, бу гаплар оғир, лекин ҳақиқат шу.
Агар гапим нотўғри бўлса қани эртагаёқ халқни норози қилган иш — автомобиль нархларини туширинг, сотилмай чириётган автомобилларни янаям арзон қилиб сотинг, ҳеч бўлмаса тез ёрдам учун Damas’ларингизни арзонлатинг, мен ёлғончи бўлай, розиман.
Менга сайловчилар билан қандай ишлашни ўргатиш эса сизгамас. Ҳар қалай сиздан фарқли равишда мен имкониятим борича уларни рози қилишга ҳаракат қиламан, оғир кунида фойда қилишни ўйламайман.
Сўнггида маслаҳатим: аччиқ бўлса ҳам фактни факт билан енгади, олди-қочди, жаҳл гаплар билан эмас. Буни пиарчиларингизга ҳам тушунтиринг!
Расул Кушербаев, Олий Мажлис Қонунчилик палатаси депутати
Изоҳ (0)