Ўзбекистон ташқи ишлар вазири ўринбосари Шерзод Асадов 20 июль куни Вена шаҳрида БМТ бош котибининг ўринбосари, БМТнинг Гиёҳванд моддалар ва жиноятчиликка қарши кураш бошқармаси (БМТ ГMЖҚКБ) ижрочи директори Гада Вали, Атом энергияси бўйича халқаро агентлик (IAEA) бош директори Рафаэл Гросси ва БМТ Саноатни ривожлантириш ташкилоти (UNIDO) бош директори Ли Йонг билан учрашувлар ўтказди. Бу ҳақда Ташқи ишлар вазирлиги ахборот хизмати хабар қилди.
Хабарда қайд этилишича, БМТ вакиллари Ўзбекистонда ижтимоий-сиёсий ва ижтимоий-иқтисодий соҳаларда амалга оширилаётган кенг кўламли ўзгаришларга ижобий баҳо берган. Улар кичик ва ўрта бизнес ҳамда саноат секторини қўллаб-қувватлаш, аҳоли турмуш шароитининг ёмонлашувига йўл қўймаслик, шунингдек, COVID-19 пандемияси даврида жиноятчиликнинг олдини олиш бўйича олиб борилаётган ишларни ҳам муҳокама қилган.
Гада Вали коррупциянинг олдини олиш ва унга қарши курашиш борасидаги Ўзбекистон саъй-ҳаракатларини юқори баҳолаб, Коррупцияга қарши курашиш агентлиги ташкил этилганини олқишлаган. Агентликка ҳар томонлама ёрдам беришга тайёрлигини билдирган.
Шунингдек, томонлар Ўзбекистон ва БМТ ГMЖҚКБ ўртасидаги ҳамкорликнинг ҳолати ва истиқболларини муҳокама қилган. БМТ ГMЖҚКБ раҳбари ушбу агентлик ва БМТ ГMЖҚКБ ўртасида ўзаро англашув меморандумини имзолашни ва ҳамкорликнинг аниқ йўналишларини белгилаш ва лойиҳаларни татбиқ этишга донорлик маблағларини йўналтириш мақсадида халқаро стандартларга мувофиқ республикада коррупцияга қарши кураш сиёсати ва стратегияларини амалга оширишни қўллаб-қувватлаш бўйича концептуал қайднома тайёрлашни таклиф қилган.
IAEA томонидан Ўзбекистон ядровий инфратузилмасини ривожлантиришдаги муваффақиятли ҳамкорлик, хусусан, 2020 йилнинг декабрь ойида бўлиб ўтадиган республиканинг ядровий инфратузилмасини комплекс баҳолаш бўйича миссияга биргаликда тайёргарлик кўриш юқори баҳоланган.
Агентлик раҳбари Рафаэл Гросси Ўзбекистон ядро дастурининг амалга оширилиши жараёнидан мамнунлигини ҳамда янги ядро давлатлари учун Ўзбекистон IAEA билан муносабатларни қуриш бўйича намуна эканлигини қайд этган.
Эслатиб ўтамиз, Ўзбекистон делегацияси МАГАТЕ томонидан 2020 йилнинг 10—14 февраль кунлари ташкилотнинг Венадаги бош қароргоҳида ўтказилаётган Физикавий ядровий хавфсизлик бўйича халқаро анжуманда иштирок этган. Февраль ойида Ўзбекистон 2020 йилда МАГАТЕ Ядровий инфратузилмасини комплекс кўриб чиқиш бўйича миссиясининг ўтказилиши юзасидан сўров юборгани ва бу 2020 йилнинг октябрида бўлиб ўтиши ташкилот томонидан маъқуллангани хабар қилинганди.
IAEA раҳбари техник кооперация лойиҳалари доирасида Ўзбекистон билан, хусусан Наманган онкологик диспансери, Республика эндокринология маркази, Самарқанд давлат университети ва Тошкент шаҳар онкология ва радиология маркази билан ҳамкорлик қилиш муҳимлигини таъкидлаган.
«UNIDO Ўзбекистонни минтақадаги улкан ресурс, иқтисодий ва инсоний салоҳиятга эга бўлган муҳим давлат сифатида кўради. Шу муносабат билан Ли Йонг республикада мустаҳкам саноат инфратузилмаси, универсал ва барқарор саноатлаштиришни таъминлаш учун шароитлар яратилганлигини мамнуният билан қайд этди.
Бош директор коронавирус пандемиясидан зиён кўрган республика иқтисодиётининг айрим тармоқларини тиклаш учун UNIDO салоҳиятини жалб қилишга ёрдам беришга тайёрлигини изҳор қилди.
Саноатнинг «тоза инновация» ва «яшил» технологиялар соҳасидаги аниқ лойиҳаларни амалга ошириш бўйича ўзаро ҳамкорликнинг истиқболлари кўриб чиқилди, бу эса барқарор саноат дизайни ва брендлаш воситаларини ривожлантириш учун шароит яратиши қайд этилди.
Бундан ташқари, ўзаро муносабатларни сифат жиҳатидан янги босқичга олиб чиқадиган Ўзбекистон ва UNIDO ўртасидаги ҳамкорликни янада мустаҳкамлаш бўйича қўшма декларация ва 2020—2024 йилларга мўлжалланган ҳамкорликни янада ривожлантириш бўйича «Йўл харитаси» лойиҳаларини тайёрлаш жараёни муҳокама қилинди», – дейилади ТИВ хабарида.
Аввал Ўзбекистон Республикаси ташқи ишлар вазирининг ўринбосари Шерзод Асадов 17 июль куни Вена шаҳрида Европада хавфсизлик ва ҳамкорлик ташкилоти бош котиби Томас Гремингер ва ЙХҲТнинг доимий кенгаши раиси Игли Ҳасани билан учрашувлар ўтказгани хабар қилинганди.
Изоҳ (0)