Тошкент вилоятида 1,5 тоннадан зиёд ноқонуний алюминий олиб кетаётган юк машинаси ҳайдовчи қўлга олинди

Тошкент вилоятида Isuzu машинасида 1,5 тоннадан кўпроқ миқдорда алюминий рангли металлини ноқонуний равишда олиб кетаётган ҳайдовчи фош қилинди. Бу ҳақда «Дарё»га Тошкент вилояти ИИББ ЙҲХБ ахборот хизмати хабар қилган.

Хабарга кўра 2020 йил 19 июль куни Тошкент вилоятининг «Чинор» мунтазам ЙПХ масканида хизмат олиб бораётган ЙПХ инспекторлари кичик сержант Ж.Абдураҳмонов ва сафдор Я.Тошев текшириш учун Isuzu транспорт воситасини тўхтатган. Транспорт воситаси кўздан кечирилганда автомобиль юкхонасида қопларга яширилган алюминий парчалари борлиги аниқланган.

1986 йилда туғилган ҳайдовчи У.А.дан ушбу алюминий парчаларининг ҳужжатлари сўралганда бу борада тегишли ҳужжатларни тақдим этмаган. Шундан кейин ушбу рангли металлар тегишли тартибда расмийлаштирилган ва Оҳангарон тумани ИИБга топширилган.

Суриштирув жараёнида машинада умумий оғирлиги 1510 килограмм (1,5 тонна) бўлган рангли металл парчалари борлиги аниқланган.

Аввалроқ Бухоро вилоятида божхона тўловларини тўламаслик мақсадида хорижий мамлакатдан олиб келинган иккита Howo русумли юк машинасининг ишлаб чиқарилган йилини нотўғри кўрсатиш орқали ноқонуний имтиёз олишга уриниш ҳолатлари аниқлангани, 13 мартда Ўзбекистонга юк машиналарини ноқонуний олиб кириш билан шуғулланган жиноий гуруҳ фош қилингани, 12 апрель куни Давлат божхона қўмитаси ва ДХХ ходимлари ҳамкорлигида ўтказилган тезкор тадбир давомида қиймати 20 миллиард сўмлик тамаки маҳсулотларининг ноқонуний равишда олиб кирилишига чек қўйилгани ҳақида хабарлар берилган.