Тошкент вилояти Қуйи Чирчиқ туманида 28 ёшли А.Г. антиқа жиноятни содир этди ва қамоққа тушди. Бу ҳақда ИИВ ҳузуридаги Тергов департаменти хабар қилган.
Департамент хабарига кўра, 2020 йил 14 июль куни тунги соат 01:30 да 28 ёшли А.Г. Қуйи Чирчиқ тумани «Бешкент» МФЙ да яшовчи 33 ёшли А.К.нинг уйига ғайриқонуний равишда кирган. У ҳовлида турган «ВАЗ-2106» машинасини ўт олдириб, кўчага олиб чиққан ва «Кўксарой» маҳалласи томон ҳаракатланган. Бироқ машина техник жиҳатдан носоз бўлиб бузилиб қолгани оқибатида «ВАЗ-2106»ни йўл четида қолдириб, чап олд эшиги ойналарини синдириб ҳодиса жойидан яширинган.
Ҳолат юзасидан Қуйи Чирчиқ туман ИИБ ҳузуридаги Тергов бўлими томонидан Ўзбекистон Республикаси Жиноят кодексининг 267-моддаси 1-қисми (Транспорт воситасини олиб қочиш) билан жиноят иши қўзғатилган.
А.Г. айбланувчи тариқасида жиноят ишига жалб қилиниб, унга нисбатан қамоққа олиш тарзидаги эҳтиёт чораси қўлланилган. Ҳозирда дастлабки тергов ҳаракатлари давом этмоқда.
Аввал 14 июнда Фарғонада «мойка»дан ўзганинг Nexia машинасини миниб қочган шахс ушлангани, май ойида эса Наманганда маст ҳолда «Москвич» олиб қочган фуқаро ЙТҲга учрагани ҳақида хабарлар берилган.
Изоҳ (0)