Ўзбекистоннинг «Радиоалоқа, радиоэшиттириш ва телевидение маркази» давлат унитар корхонаси капитал қурилиш бўйича директори Алишер Абдуазизов 2020 йил 20 июль куни бевақт оламдан ўтди. Бу ҳақда компания матбуот хизмати хабар берди.
Алишер Абдуазизов 1961 йилда Тошкент шаҳрида туғилган. Меҳнат фаолиятини 1983 йилда бошлаб, алоқа ва ахборотлаштириш соҳасидаги «Ўзбектелеком» акциядорлик компанияси, Тошкент ахборот технологиялари университети, Республика ахборот-кутубхона маркази, Алишер Навоий номидаги Ўзбекистон Миллий кутубхонасида турли раҳбарлик лавозимларда фаолият олиб борган ҳамда соҳа ривожига улкан ҳисса қўшган. Алишер Абдуазизов айни кунга қадар «Радиоалоқа, радиоэшиттириш ва телевидение маркази»нинг капитал қурилиш бўйича директори лавозимида меҳнат фаолиятини олиб борган.
«Алишер Абдуазизов алоқа ва ахборотлаштириш соҳасининг ривожига катта ҳисса қўшган раҳбарлардан бири бўлиб, масъулиятли, самимий, ўз касбининг устаси, жонкуяр ва фидойи инсон эди», — дейилади ДУК хабарида.
«Радиоалоқа, радиоэшиттириш ва телевидение маркази» ДУК меҳнат жамоаси марҳумнинг қариндош ва яқинларига, ҳамкасбларига чуқур таъзия ва ҳамдардлик изҳор этган.
Корхона матбуот хизмати хабарида 59 ёшли Алишер Абдуазизовнинг ўлимига нима сабаб бўлгани маълум қилинмаган.
Аввалроқ Марказий банк раисининг собиқ ўринбосари Ашур Қодиров, Ўзбекистонда хизмат кўрсатган маданият ходими, рассом Зубайдулла Ботиров, Ички ишлар вазирлиги Йўл ҳаракати хавфсизлиги бош бошқармаси Ахборот хизмати катта мутахассиси, подполковник Зойир Сайдалиев вафот этгани ҳақида хабарлар берилганди.
Изоҳ (0)