Ўзбекистон ва Россия Транспорт вазирликлари вакиллари видеоалоқа режими орқали соҳага оид ҳамкорлик масалаларини муҳокама қилди. Бу ҳақда Россия Транспорт вазирлиги сайтида маълум қилинди.
Ўзбекистон томонидан транспорт вазири Элёр Ғаниев, Россия томонидан эса транспорт вазирининг биринчи ўринбосари, «Росавиация» раҳбари Александр Нерадко иштирок этган.
Улар икки томонлама ҳамкорлик, асосан, ҳаво транспортидаги ҳамкорлик масалаларини муҳокама қилган. Хусусан, «Росавиация» ва Фуқаролик авиацияси агентлиги ўртасидаги учишга яроқлилик бўйича ҳамкорликка оид битимни тайёрлаш ва имзолаш борасида фикр алмашилган.
Бундан ташқари, икки давлат орасида рейслар сонини ошириш ҳамда йўловчи ва юкларни ташишга мўлжалланган Россия—Ўзбекистон лоукост-авиаташувларини яратиш имконияти муҳокама қилинган.
Ўзбекистонда миллий лоукостер яратиш ҳақида 2018 йилнинг бошларида гап-сўзлар тарқалган эди. Тахминларга кўра, у Миллий авиакомпаниянинг шўъбасига айланиши керак эди, бироқ кейинроқ компаниянинг ўзи бир неча алоҳида компанияга бўлиб ташланди.
Эслатиб ўтамиз, «Ўзбекистон ҳаво йўллари» миллиай авиакомпанияси қайта ташкил этилиши натижасида унинг ўрнига учта аҳолида компания — Uzbekistan Airways, Uzbekistan Airports ва Uzbekistan Helicopters ташкил қилинган. Бундан ташқари, Ўзбекистонда яна бешта янги авиакомпания, хусусан, Humo Air авиакомпаниясини ташкил этиш ишлари олиб борилмоқда.
Изоҳ (0)