«Тез ёрдам ‘резиновий’ эмас, у ҳар бир чақирувга улгуролмайди» — Тошкентдаги тез тиббий ёрдам шифокори

Тошкент шаҳрида сўнгги кунларда тез тиббий ёрдам хизматига тана ҳароратининг кўтарилиши билан боғлиқ чақирувлар кескин кўпайган. Бу ҳақда Тошкент шаҳридаги тез тиббий ёрдам станцияси шифокори Нуриддин Зоҳидов «Ўзбекистон 24»нинг «COVID-19. Вазият» дастурига жонли эфирда берган интервьюсида айтиб ўтди.

Ҳозир тана ҳароратининг кўтарилиши ҳолатлари жуда кўпайиб кетган. Иситмаси 37 даражага кўтарилса ҳам одамлар қўрқяпти, ваҳима кўтариляпти, «коронавирусга чалиниб қолдим», деб ўйлаб чақиришяпти. Чунки ҳар хил жойларга телефон қилиб, қаерга бориш кераклиги бўйича тўлиқ маълумот олишолмаяпти. Дорихоналарда дорилар етмаяпти. Шу ҳолатда энг осон йўл — тез тиббий ёрдамни чақириш. Лекин тез тиббий ёрдам «резиновий» эмас, ҳар бир «заявка»га улгура олмайди. Кейин одамлар ўтиради: «Мана, бир соатдан бери келмаяпти, икки соатдан бери келмаяпти», деб.

Авваллари, поликлиникалар ишлаётган вақтда, тана ҳарорати кўтарилиши каби ҳолатларга тез ёрдам бормасди. Ҳозир вазият оғирлашгани, коронавирус инфекцияси пайдо бўлгани учун, тез ёрдам бригадаси тана ҳарорати кўтарилиши билан боғлиқ чақирувга боришга мажбур. Лекин халқ ҳам тўғри тушунсин — тана ҳарорати 37—38 даражага чиққанида, одам оғирлашиб қолмайди, бирпасда мазаси қочиб қолмайди. Иситма қилиб 3—4 ётади-да, кейин бирдан «тез ёрдам» эсига тушиб қолади. Тез ёрдам ярим соат—бир соатнинг ичида келиб, бирпасда даволаб бериши керак экан. Лекин тез ёрдам бу ишлар билан шуғулланмайди.

Шунинг учун, халқдан илтимос, одамлар вақтида сал ўзига ҳам қарасин. Ҳароратни туширадиган дорини ичадими, қон босими ошиши ҳолатлари ҳам кўп — улар ҳам вақтида дорисини ичадими, сал ўзига қарасин.

Нуриддин Зоҳидов, Тошкент шаҳар тез тиббий ёрдам станцияси шифокори

Эслатиб ўтамиз, Президент Шавкат Мирзиёев раислигида 15 июль куни бўлиб ўтган видеоселектор йиғилишида Ўзбекистонда «сўнгги уч кунда тез ёрдамнинг вақтида етиб бормагани сабаб 43 киши турли касалликлардан вафот этгани» маълум қилинган эди. Ушбу видеоселектордан сўнг «Ўзбекистон 24» дастурига интервью берган Ўзбекистон бош прокурори Ниғматилла Йўлдошев «энди тез ёрдам 15 дақиқа ичида ети бориши»ни маълум қилган эди.