Аввалроқ Ўзбекистонда коронавирусдан уйида даволанаётган беморлар бепул дори-дармон билан таъминланиши, уларнинг орасида «Гидроксихлорохин» препарати борлиги тармоқларда бир қанча баҳсларга сабаб бўлган эди.
Коронавирусга қарши кураш штаби аъзоси Феруза Ҳамробоева ушбу эътирозларга муносабат билдириб ўтди.
Жумладан, аҳолининг «Гидроксихлорохин»ни коронавирус инфекциясини даволашда қўллаш нотўғрилиги маълум қилинди. Чунки касалликка қарши кўрсатмалари кўп экан. Лекин нега бу препарат даволаш протоколига киритилган?, деган саволига мутахассис қуйидагича жавоб берган.
«Гап шундаки, биз ўзимизнинг консултатив вебинарларимизни асосан Хитой билан олиб боряпмиз. Чунки бу вирус қайд этилган илк ҳудуд, уларнинг тажрибаси кўпроқ ва дастлабки кунларданоқ уларнинг тажрибасини қўллаб келяпмиз. Беморларни даволаш жараёнида бу яхши натижа берган. Агар бундай олиб қаралса, қўллашга қарши ҳолатлар қайси кучли таъсирга эга дориларда йўқ дейсиз? Албатта, ҳаммасида бор. Аммо биз доим фойда ножўя таъсиридан кўпроқ бўлса, тажрибамизда амалий ифодасини топса, қўллаймиз. Бунинг устига айтишим керакки, клиник протокол бу бир умрлик ҳужжат эмас, у доим қайта кўриб чиқилади олинадиган маълумотга қараб. Қайсидир препаратлар киритилади, бошқалари чиқарилади»,— дея саволга жавоб берди Феруза Ҳамробоева.
Ҳамробоева тилга олган Хитойдаги тадқиқотлар безгакка қарши дори пневмония ривожланишини тўхтатишда, ўпка ҳолатини яхшилашга ва касаллик давомийлигини қисқартиришга самарали таъсирини кўрсатгани аниқланган. Тадқиқот муаллифлари, коронавирусни даволаш учун ҳар куни 500 мг «Хлорохин»ни 10 кун давомида қабул қилиш етарлилигини таъкидлаган.
Шунингдек, 2020 йил февраль ойида француз олимлари янги коронавирусга қарши иккита мавжуд дори препаратлари: «Гидроксихлорин» ва «Азитромицин»нинг комбинациясидан фойдаланишнинг клиник тажрибаси муваффақиятли натижаси тўғрисида маълум қилган. Француз олимлари «Гидроксихлорохин» препаратини алоҳида ва антибиотик таъсирга эга «Азитромицин» билан бирга COVID-19’ни даволаш учун биринчи марта клиник тажрибадан ўтказган. Даволашнинг 5-кунида барча беморларда коронавирусга тест таҳлили манфий натижа кўрсатган, яъни 5 кун ичида клиник тажрибадаги барча беморлар коронавирусдан соғайгани таъкидланди.
Маълумот учун, «Гидроксихлорин« безгак ва ревматологик касалликларга қарши препаратдир. У хинин (хлорохин) моддасининг синтетик аналоги асосида тайёрланади. Тиббиётда ундан 1955 йилдан буён фойдаланилади.
Эслатиб ўтамиз, 16 июль куни Ўзбекистон бош вазири Абдулла Арипов раҳбарлигида коронавирус пандемиясига қарши курашиш бўйича Республика махсус комиссиясининг йиғилишида уйида даволанаётган коронавирус беморларини бепул дори-дармонлар билан таъминлаш юзасидан қарор қабул қилиниб, уларга етказиб бериладиган дори-дармонлар рўйхати тасдиқланганди. Ушбу рўйхатга «Гидроксихлорохин», «Азитромицин», «Парацетамол», «C Витамин» каби дори-дармонлар киритилган.
