Тошкентда тез ёрдам ходимлари битта «заявка»га фақат бир нафар беморни текшираётганига изоҳ берилди

Telegram’да Тошкент шаҳрида фуқаронинг хонадонига чақирувга келган тез ёрдам гуруҳининг биттадан ортиқ беморни кўрмаслигини айтиб одамлар билан баҳслашаётгани ҳақидаги видео тарқалган эди.

Коронавирусга қарши кураш штаби аъзоси Феруза Ҳамробоева АОКА ҳузуридаги штабда ташкил этилган брифингда ушбу ҳолатга изоҳ бериб ўтди.

«Тез ёрдам ўз номи билан тез ёрдам, битта одамга келган ‘заявка’ бўйича мана шу бригадага вақт ажратилади. Бу дегани, бригада ўша беморни кўриб қайтиб станцияга кетади, дегани эмас. Унинг кетидан яна бир нечта чақирувни амалга ошириб, зориқиб кутиб турган беморлар бор. Шунинг учун ҳам тез ёрдам вакиллари битта чақирув бўйича фақат битта беморни кўриш ваколатига эга»— дея ўз фикрини изоҳлаган Коронавирусга қарши кураш штаби аъзоси.

Бироқ мутахассис чақирувдан ташқари оиладаги бирор инсоннинг ҳолати критик бўлса, албатта, бригада тез шошилинч ёрдам кўрсатишга масъул эканлигини таъкидлаган. Шу билан биргаликда, аҳолига масалани ҳал қилиш учун тез ёрдам чақираётганда иккинчи ёки учинчи одамни ҳам ёздириб қўйиш тавсия этилди.

Эслатиб ўтамиз, Ўзбекистон бош прокурори Ниғматилла Йўлдошев 15 июль куни Президент видеоселекторидан сўнг бундан буён 15 дақиқадан кўп бўлмаган вақтда зудлик билан тез тиббий ёрдам автомашиналари тегишли ходимлар билан етиб бориши тўлиқ таъминланишини айтган, шунингдек, фуқаролар 103 га мурожаат қилганда, бандлик ҳолатлари, айниқса узоқ вақт банд бўлиш ҳолатларига мутлақо чек қўйилишини билдирганди.

Аввал Тошкент шаҳри ҳокимлиги ва Соғлиқни сақлаш вазирлиги тиббий ускуналар ва тиббий мақсадда фойдаланиш учун Damas автомобилларини сотиб олгани хабар қилинди. Ўзбекистонда коронавирус бўйича саволларга 1003 рақами орқали жавоб берадиган Call-марказ ходими «Troll.uz» каналига марказдаги вазият, иш шароитлари ва келиб тушаётган мурожаатларга хизмат кўрсатиш ҳолати ҳақида гапириб бериб, иш ҳақи олмасдан ишлаётгани ва мурожаатларга хизмат кўрсатиш яхши эмаслигини айтди.