Ўзбекистонда 19 июль соат 10:00 ҳолатига кўра расман 7218 киши коронавирусдан даволанмоқда. Бу ҳақда Соғлиқни сақлаш вазирлиги хабар берди. Қайд этиш жоиз, бу вақтга келиб жами касалланиш ҳолатлари сони 16 429 тага етган.
«Ҳозирда мамлакатимизда 7218 нафар беморга шифокорларимиз томонидан белгиланган стандартлар бўйича даво чоралари кўрилмоқда», — дейилади вазирлик ахборотида. Уларнинг қанчасида касаллик аломатларсиз (симптомларсиз) кечаётгани маълум қилинмаган. Қайд этишларича, 72 нафар беморнинг аҳволи оғир, 21 нафариники эса ўта оғир.
Маълумот учун, Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган, ушбу йўналишда йўриқнома ва эслатмалар ҳам эълон қилинган.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас.
Аввалроқ Республика махсус комиссияси 10 июль ҳолатига кўра, Ўзбекистоннинг мавжуд соғлиқни сақлаш муассасалари қуввати коронавирусга чалинган янги беморларни қабул қилиш учун етарли эмаслиги, «тизимни қайта тиклаш» учун 1 августгача кучайтирилган карантин тартиби қайтадан жорий этилганини маълум қилган эди. Ўша вақтда Ўзбекистон бўйича коронавирусдан даволанаётган беморлар сони расман 3986 нафар эди.
Иқтисодий тадқиқотлар ва ислоҳотлар маркази раҳбари Обид Ҳакимов 13 июль куни келтирган маълумотларга кўра, Тошкентда жами 16 та касалхонада коронавирус билан касалланган беморлар учун 3580 та койка-ўрин ажратилган. 19 июль соат 10:00 ҳолатига кўра, Тошкент шаҳрида аниқланган ва даволанишни давом эттираётган беморлар сони 5051 нафарни, Тошкент вилоятида эса 851 нафарни ташкил этмоқда. Ушбу 5902 нафар беморнинг қанчаси Тошкент шаҳрида, қанчаси Тошкент вилоятида даволанаётгани ҳақида аниқ маълумот йўқ.
Соғлиқни сақлаш вазири Алишер Шодмонов 7 июль куни берган интервьюсида Ўзбекистонда коронавирус эпидемияси ҳали энг юқори чўққиси чиқмаганини таъкидлаган эди (айни вақтда Ўзбекистон ҳукумати мамлакатда эпидемиянинг иккинчи тўлқини кечмоқда, деб ҳисоблаяпти). Профессор Ҳабибулла Оқиловнинг таъкидлашича, агар Ўзбекистонда кунига 1—1,5 мингта касалланиш ҳолати аниқланса, соғлиқни сақлаш тизимимиз «қўшни мамлакатларники каби» қулайди.Эътиборга молик томони, профессор Оқилов 8 июль куни қилган чиқишида Ўзбекистон соғлиқни сақлаш тизимидаги ресурслар «поёнига етгани», бўш койка-ўринлар қолмаганини маълум қилган эди. 9 июлдаги брифингда эса Оқилов «койка-ўринлар, дори захираси мавжуд»лигини, тизим «ҳар қанча беморни қабул қила олиши»ни таъкидлади. 18 июль куни Тошкент шаҳар ҳокимлиги пойтахтда коронавирусга чалинган беморларни жойлаштириш учун 2358 та койка захираси шакллантирилганини маълум қилди.
Мавзуга доир:ЎзССВ «вақтида мурожаат қилмай, уйида даволанган» деган марҳум беморни касалхоналар бир неча бор қабул қилмаган
Сарвар Каримов коронавирусга чалинганларни даволашга ихтисослаштирилган санаториядаги вазият ҳақида тўхталар экан, жумладан, шундай деб ёзди: «8 та қаватга битта инфексионист ва иккита терапевт бор экан. Бечораларнинг аҳволи бизникидан баттар. Бошқа врачлар йўқ, уколлар йўқ, аппаратлар йўқ... Врачлар жуда кам, бутун шифохонага атиги 3-4 киши. Қўлдан келганча ёрдам беришяпти, аммо уларга ҳам қийин».
Изоҳ (0)