Сурхондарё вилояти ҳокими Тўра Боболов коронавирусга чалинган бўлиши мумкинлиги ҳақидаги маълумот «Дарё»га дастлаб 15 июль куни тушганди. Вилоятдаги манбалар Термизда одатда вилоят ҳокими томонидан ўтказадиган йиғилиш ва тадбирлар унинг ўринбосари томонидан олиб борилаётганини маълум қилган эди.
Сурхондарёдаги бир неча туман ҳокимликлари расмийлари ҳам Боболов сўнгги вақтларда кўринмай қолганини қайд этди. Улар, жумладан, 11 июль куни Ангор ва Қизириқ туманларига янги ҳокимларни тайинлаш бўйича сессияларда Боболов бевосита иштирок этмай, йиғилишга Zoom дастури орқали уланганини таъкидлади.
«Дарё» мухбири шу куниёқ Сурхондарё ҳокимлиги ахборот хизмати билан боғланди. Ҳокимлик матбуот котиби Заҳириддин Тўраев ҳоким коронавирусга чалингани ҳақидаги гап-сўзлар асоссизлиги, Тўра Боболов одатдаги тартибда ишлаётганини, ҳатто 16 июль куни вилоятдаги туманлардан бирига чиқиши режалаштирилганини маълум қилди. Ҳокимнинг Ангор ва Қизириқдаги сессияларга Zoom орқали боғланганини изоҳларкан, Заҳириддин Тўраев бу кучайтирилган карантин талаблари билан боғлиқ эканини таъкидлаган эди.
Қайд этиш жоиз, ҳоким Тўра Боболов 16 июль куни ҳам, 17 июль куни ҳам бирор туманга чиқмади, ҳокимнинг туманга сафарга бўйича суратлар сўралганида берилмади, 18 июль куни эса ижтимоий тармоқларда хабарлар тарқалган вақтда ҳокимлик ахборот хизмати билан боғланиб бўлмади. «Gazeta.uz»нинг ёзишича, ҳокимнинг қабулхонаси 18 июль куни ҳам, ССВ ахбороти эълон қилиниши олдидан, Боболовнинг коронавирусга чалинганини рад этган.
Вилоят ҳокимининг коронавирусга чалиниши жиддий ҳодиса, бундан Тошкентдаги марказий расмий тузилмалар бехабар қолиши мумкин эмас. Шу боис «Дарё» мухбирлари 15 июлдаёқ ушбу ҳолат юзасидан Соғлиқни сақлаш вазирлиги билан боғланган. Вазирлик матбуот хизмати вакиллари «шундай гап-сўзлар уларга ҳам етиб келгани, лекин аниқ маълумотни Санитария-эпидемиологик осойишталик агентлиги (СЭОА)дан сўраш маъқул»лигини билдирган. Шу куни ушбу масала юзасидан СЭОА матбуот хизмати билан боғланиб бўлмаган.
18 июль куни ижтимоий тармоқларда Сурхондарё вилояти ҳокими Тўра Боболов коронавирусга чалингани ҳақида хабарлар тарқалгач, «Дарё» мухбири, ССВ матбуот хизматининг 15 июлдаги маслаҳатидан келиб чиқиб, дастлаб СЭОА матбуот хизмати билан боғланган ва ахборот олишга уринган. СЭОА матбуот котиби Муҳаммаджон Бозоров ушбу ҳолат юзасидан аниқ маълумотга эга эмаслиги, бу борада ССВдаги ҳамкасби Фурқат Санаев билан боғланиш мақсадга мувофиқлигини таъкидлаган.
Ўз навбатида ССВ матбуот котиби Фурқат Санаев унда «ҳозир аниқ маълумот йўқ»лиги, «10—15 минут сабр қилиб туриш»ни сўраб, «аниқлаштириб, хабар бериши»ни маълум қилган. Орадан 20 дақиқа ўтгач мухбир ССВ матбуот хизмати билан боғланишга қайта-қайта уринган, бироқ қўнғироқлар жавобсиз қолган. Шундан сўнг мухбир яна СЭОА матбуот котиби Муҳаммаджон Бозоров билан боғланиб, ундан агентликнинг Сурхондарёдаги вакили телефон рақамини сўраган.
Бозоров ҳозир ишда эмаслиги, телефон рақамлари ёнида эмаслигини айтган, шундан сўнг мухбир уни шахсий масалада эмас, балки агентлик фаолиятига дахлдор ҳолат юзасидан безовта қилаётганини таъкидлагач, СЭОА вакили: «Ҳокимнинг коронавирусга чалинганини аниқлаштириб берсам бўлдими?», дея гўшакни қўйган. Мухбир яна ССВ матбуот котибига қўнғироқ қилган, у эса вазирликнинг Telegram-каналида сўралаётган масала юзасидан ахборот чиқиб бўлганини маълум қилган — дарҳақиқат, вазирлик Telegram-каналида ёзиб тайёрланишига ва расман келишилиб тасдиқланишига 20 дақиқадан кўпроқ вақт кетадиган катта ахборот чиққан, бироқ 20 дақиқа аввалги сўровга «ҳозир аниқ маълумот йўқ» дейилгани юзасидан мухбирга тушунтириш берилмаган.
Эслатиб ўтамиз, Соғлиқни сақлаш вазирлиги Сурхондарё вилояти ҳокими Тўра Боболовдан ташқари Қорақалпоғистон Жўқорғи Кенгеси раиси Муса Ерниёзов ҳам коронавирусга чалинганини тасдиқлади. Бу Ўзбекистонда юқори мартабали шахсларнинг коронавирусга чалингани билан боғлиқ расман тасдиқланган дастлабки ҳолатлардир. Айни вақтда, «Дарё» манбаларининг таъкидлашича, бу Ўзбекистонда ҳокимларнинг COVID-19 ни юқтириб олиши билан боғлиқ биринчи ва ягона ҳолатлар эмас.
Изоҳ (0)