O‘zbekistonda koronavirusdan davolanayotgan bemorlar soni 7 mingdan oshdi. Ularning qanchasida kasallik simptomlarsiz kechmoqda — noma’lum

O‘zbekistonda 19-iyul soat 10:00 holatiga ko‘ra rasman 7218 kishi koronavirusdan davolanmoqda. Bu haqda Sog‘liqni saqlash vazirligi xabar berdi. Qayd etish joiz, bu vaqtga kelib jami kasallanish holatlari soni 16 429 taga yetgan.

“Hozirda mamlakatimizda 7218 nafar bemorga shifokorlarimiz tomonidan belgilangan standartlar bo‘yicha davo choralari ko‘rilmoqda”, — deyiladi vazirlik axborotida. Ularning qanchasida kasallik alomatlarsiz (simptomlarsiz) kechayotgani ma’lum qilinmagan. Qayd etishlaricha, 72 nafar bemorning ahvoli og‘ir, 21 nafariniki esa o‘ta og‘ir.

Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.

Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.

Avvalroq Respublika maxsus komissiyasi 10-iyul holatiga ko‘ra, O‘zbekistonning mavjud sog‘liqni saqlash muassasalari quvvati koronavirusga chalingan yangi bemorlarni qabul qilish uchun yetarli emasligi, “tizimni qayta tiklash” uchun 1-avgustgacha kuchaytirilgan karantin tartibi qaytadan joriy etilganini ma’lum qilgan edi. O‘sha vaqtda O‘zbekiston bo‘yicha koronavirusdan davolanayotgan bemorlar soni rasman 3986 nafar edi.

Iqtisodiy tadqiqotlar va islohotlar markazi rahbari Obid Hakimov 13-iyul kuni keltirgan ma’lumotlarga ko‘ra, Toshkentda jami 16 ta kasalxonada koronavirus bilan kasallangan bemorlar uchun 3580 ta koyka-o‘rin ajratilgan. 19-iyul soat 10:00 holatiga ko‘ra, Toshkent shahrida aniqlangan va davolanishni davom ettirayotgan bemorlar soni 5051 nafarni, Toshkent viloyatida esa 851 nafarni tashkil etmoqda. Ushbu 5902 nafar bemorning qanchasi Toshkent shahrida, qanchasi Toshkent viloyatida davolanayotgani haqida aniq ma’lumot yo‘q.

Sog‘liqni saqlash vaziri Alisher Shodmonov 7-iyul kuni bergan intervyusida O‘zbekistonda koronavirus epidemiyasi hali eng yuqori cho‘qqisi chiqmaganini ta’kidlagan edi (ayni vaqtda O‘zbekiston hukumati mamlakatda epidemiyaning ikkinchi to‘lqini kechmoqda, deb hisoblayapti). Professor Habibulla Oqilovning ta’kidlashicha, agar O‘zbekistonda kuniga 1—1,5 mingta kasallanish holati aniqlansa, sog‘liqni saqlash tizimimiz “qo‘shni mamlakatlarniki kabi” qulaydi.

E’tiborga molik tomoni, professor Oqilov 8-iyul kuni qilgan chiqishida O‘zbekiston sog‘liqni saqlash tizimidagi resurslar “poyoniga yetgani”, bo‘sh koyka-o‘rinlar qolmaganini ma’lum qilgan edi. 9-iyuldagi brifingda esa Oqilov “koyka-o‘rinlar, dori zaxirasi mavjud”ligini, tizim “har qancha bemorni qabul qila olishi”ni ta’kidladi. 18-iyul kuni Toshkent shahar hokimligi poytaxtda koronavirusga chalingan bemorlarni joylashtirish uchun 2358 ta koyka zaxirasi shakllantirilganini ma’lum qildi.

Koronavirusga chalingan bemorlarni davolashga ixtisoslashtirilgan muassasalar orasida Toshkentning Yunusobod tumanidagi “Nuroniylar” sanatoriyasi ham bor. Poytaxt hokimligi axborotiga ko‘ra, u yerda 300 ta koyka tashkil etilgan. Otasi koronavirusdan vafot etganini ma’lum qilgan rejissor Sarvar Karimov akasi va singlisi bilan birga 18-iyulga o‘tar kechasi shu muassasaga joylashtirilgan.

Sarvar Karimov koronavirusga chalinganlarni davolashga ixtisoslashtirilgan sanatoriyadagi vaziyat haqida to‘xtalar ekan, jumladan, shunday deb yozdi: “8 ta qavatga bitta infeksionist va ikkita terapevt bor ekan. Bechoralarning ahvoli biznikidan battar. Boshqa vrachlar yo‘q, ukollar yo‘q, apparatlar yo‘q... Vrachlar juda kam, butun shifoxonaga atigi 3-4 kishi. Qo‘ldan kelgancha yordam berishyapti, ammo ularga ham qiyin”.