Ижтимоий тармоқларда фарзандининг иситмаси кўтарилиб, нафас олиши қийинлашаётгани ва тез ёрдамга қўнғироқ қилсада-да, зарур тиббий ёрдам кўрсатилмаётганидан шикоят қилган онанинг Самарқанд вилояти ҳокими Эркинжон Турдимовга видео мурожаати тарқалди.
Видеода она 27 ёшли фарзандининг иситмаси кўтарилиб, 10 кундан бери тушмаётгани, нафас олиши қийинлашаётганини, тез ёрдамга қўнғироқ қилса-да, келмагани, поликлиника ҳам ёрдам бермаганини айтган.
Zarnews’нинг Самарқанд вилояти соғлиқни сақлаш бошқармасига таяниб хабар беришича, айни пайтда Самарқанд шаҳридан бўлган бемор А.Мусинов вилоят юқумли касалликлар шифохонасига ётқизилиб, даволанмоқда.
«10 июлдан бошлаб беморнинг тана ҳарорати 38 гача кўтарилган ва уй шароитида даволанган. Лекин жараён поликлиника бўлим бошлиғи томонидан назорат қилиб борилган. 13 июль куни бемор поликлиникада тузилган врачлар гуруҳи томонидан кўрилган ва умумий аҳволи тўғри баҳоланиб, стационарга ётқизилган. Ҳозирда беморнинг умумий ҳолати яхши», — деган Самарқанд шаҳар тиббиёт бирлашмаси бошлиғи Аҳмаджон Бобожонов.
Шунингдек, беморнинг онаси томонидан ўзига йўлланган аудиоёзувни ҳам тақдим этган. Унда аёл боласининг аҳволи оғирлашгани учун хавотир олгани, она бўлгани учун уни тўғри тушунишни сўраган.
Эслатиб ўтамиз, Президент Шавкат Мирзиёев 15 июль, чоршанба куни Тошкент шаҳри ва Тошкент вилоятида пандемия билан боғлиқ вазият муҳокамасига бағишланган видеоселектор йиғилишида Тошкентда охирги 3 кунда тез ёрдамнинг вақтида етиб бормагани сабабли 43 киши турли касалликлар билан вафот этгани маълум қилинган.
Ўзбекистон бош прокурори Ниғматилла Йўлдошев ушбу видеоселектордан сўнг «энди тез ёрдам 15 дақиқа ичида етиб боради», деб айтган, бундан буён ҳар бир фуқаро 103 га мурожаат қилганда, бандлик ҳолатлари, айниқса узоқ вақт банд бўлиш ҳолатларига мутлақо чек қўйилишини билдирган.
Мавзуга доир: Ўзбекистонда тез ёрдам вақтида етиб келмагани оқибатида 2 йилда 48 мингдан ортиқ одам вафот этган
Маълумот учун, 2017—2018 йиллар мобайнида Ўзбекистон тарихида биринчи марта тез тиббий ёрдам хизмати учун 1500 та янги ихтисослашган автомашина харид қилинган. 2020 йил январь ойида Тошкентдаги тез тиббий ёрдам хизмати учун хориждан келтирилган 150 та Ford замонавий реанимобили фойдаланишга топширилган. Вилоятларда ҳам шундай тизимни жорий қилиш режалаштирилган. Бундан ташқари, Ўзбекистонда Isuzu D-Max пикаплари негизида тез тиббий ёрдам машиналарини ишлаб чиқариш режалаштирилмоқда.
Изоҳ (0)