AQShning Kolorado shtatida yashovchi fuqaro qora o‘latga chalingani qayd etildi, deb xabar bermoqda Denver Post. Ammo shifokorlar tashvishlanish uchun jiddiy sabablar yo‘q deb hisoblamoqda.
Qayd etilishicha, bu shtatda qora o‘latga chalinish bo‘yicha 2015-yildan beri kuzatilgan birinchi holat. Amerikalik virusni olmaxondan yuqtirgan, deb taxmin qilinmoqda. Kasallangan bemor sog‘ayib ham bo‘lgan.
14-iyul kuni Koloradoda olmaxon qora o‘latga chalingani ma’lum bo‘lgan. U shtat poytaxti Denver yaqinidagi Morrison shahrida qayd etilgan birinchi virus tashuvchi bo‘ldi.
Shifokorlar, zarur choralar ko‘rilsa kasallik tarqalishi uyoqda tursin, infeksiya yuqtirishi ehtimoli juda kam deb hisoblamoqda.
Ma’lumot uchun, qora o‘lat kemiruvchilar (yumronqoziq, sug‘urlar, qum sichqonlari, dala sichqonlari va aholi yashaydigan joylardagi kalamushlar)da yashaydigan burgalar orqali tarqaladi. O‘lat mikrobi hayvondan odamga va odamdan odamga transmissiv yo‘l bilan (masalan, burga chaqqanda), ba’zan kasal hayvon go‘shtini nimtalaganda, shuningdek, ovqatga yaxshi tekshirilmagan go‘sht ishlatilganda yuqadi.
Avvalroq Xitoyda koronavirusdan ham xavfli bo‘lgan qora o‘lat tarqalgani, mamlakat shimolidagi Bayan-Nur shahrida qora o‘lat xavfining uchinchi darajasi e’lon qilingani to‘g‘risida xabar berilgandi. Tibbiyot fanlari doktori, o‘ta xavfli kasalliklar bo‘yicha mutaxassis bo‘lgan rossiyalik Vladislav Jemchugov qora o‘lat xavflilik darajasiga ko‘ra, koronavirusdan ham birinchi o‘rinda turishini aytgandi.
Izoh (0)