Бразилиялик шифокорлар COVID-19’га қарши «Гидроксихлорохин» препаратидан фойдаланмасликка чақирди, деб хабар бермоқда «РИА Новости». Бу препаратни мамлакат президенти Жаир Болсонару қабул қилмоқда, Ўзбекистонда ҳам коронавирусдан уйда даволанаётган беморларга бепул етказиб бериладиган дори-дармонлар рўйхатига киритилган.
«COVID-19’ни даволашнинг ҳар қандай босқичидан ‘Гидроксихлорохин’ни зудлик билан олиб ташлаш керак», — дейилади Бразилия инфектологлари жамияти баёнотида.
Олимлар самарасиз ва ножўя таъсирларни келтириб чиқарадиган дори-дармонга давлат маблағларини сарфламаслик учун Соғлиқни сақлаш вазирлигини коронавирус билан касалланган беморларни даволаш бўйича сиёсатни қайта кўриб чиқишга чақирди.
Бу препаратни қабул қилаётган мамлакат президенти Жаир Болсонару эса унга фойда бераётганини таъкидламоқда. Ўз вақтида АҚШ президенти Дональд Трамп ҳам коронавируснинг олдини олиш мақсадида қабул қилган.
Жаҳон соғлиқни сақлаш ташкилоти коронавирус инфекциясига қарши синовдан ўтказилаётган препаратлар қаторидан «Гидроксихлорохин» олиб ташлангани ҳақида июль ойида хабар берганди.
Май ойининг охирларида ЖССТ «Гидроксихлорохин»нинг хавфсизлигидан хавотирланиб, унинг синовларини тўхтатган, ЖССТ раҳбари Тедрос Гебрейесус ушбу дори воситасини истеъмол қилганларда ўлим даражаси ортганини маълум қилганди. Июнь ойида ташкилот эксперти Анна Мария Рестрепо синовлар тўлиқ тўхтатилишини билдирган.
Шунингдек, АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (FDA) касалхонага ётқизилган беморларни коронавирусдан даволашда безгакка қарши «Гидроксихлорохин» препаратидан фойдаланишга берган рухсатини 15 июнь куни бекор қилган. Янги клиник тадқиқотлар эндиликда ушбу дориларни коронавирусга қарши самарали деб топишга ҳеч қандай сабаб йўқлигини кўрсатган.
«Биз илм-фанга таянишимиз, COVID-19 ҳақида янада кўпроқ маълумот олганимиз сари бу борадаги қарорларимиз ўзгариши мумкинлигини таъкидлагандик», — деган FDA’нинг тиббий ва илмий масалалар бўйича ўринбосари Ананд Шаҳ.
Маълумот учун, «Гидроксихлорин« безгак ва ревматологик касалликларга қарши препаратдир. У хинин (хлорохин) моддасининг синтетик аналоги асосида тайёрланади. Тиббиётда ундан 1955 йилдан буён фойдаланилади.
Эслатиб ўтамиз, 16 июль куни Ўзбекистон бош вазири Абдулла Арипов раҳбарлигида коронавирус пандемиясига қарши курашиш бўйича Республика махсус комиссиясининг йиғилишида уйида даволанаётган коронавирус беморларини бепул дори-дармонлар билан таъминлаш юзасидан қарор қабул қилиниб, уларга етказиб бериладиган дори-дармонлар рўйхати тасдиқланганди. Ушбу рўйхатга «Гидроксихлорохин», «Азитромицин», «Парацетамол», «Витамин C» каби дори-дармонлар киритилган.
Изоҳ (0)